ASNN – Në kuadër të javës së katërt të Kampionatit Kombëtar në Basketboll për meshkuj, u luajt mbrëmë në Sallën Sportive të Bathores dueli midis Kamza Basket dhe Teutës, e cila rezultoi një triumf i madh i ekipit durrsak me shifrat e thella, 116-78. Ishte një ndeshje e bukur, por dukshëm “Djemtë e detit” bëjnë diferencë këtë sezon dhe ky edicion mund të na njohë me një kampion të ri në Superligën e meshkujve të koshit shqiptar.
Kamza nuk e ka më “petkun” e viteve të shkuara dhe ka humbur mjaft në cilësi, por në ndeshjen e së premtes i duhet dhënë “haku” Teutës, e cila qëndron shumë lart. Pas fitoreve ndaj Goga Basket dhe dy fitoreve në Balkan Ligë ndaj bullgarëve të Bulteks Akademi si dhe skuadrës shqiptare të Prizrenit, KB Bashkimi, sot ishte radha e Kamzës të provonte forcën e Teutës. Durrsakët fitojnë përfundimisht këtë ndeshje me shifrat e thella 116-78, pra me 38 pikë diferencë, duke dëshmuar superioritet.
Por edhe marrjen e vetme të kryesimit tek meshkuj me 7 pikë, duke pritur i qetë dy ndeshjet e tjera të kësaj jave. Në këtë kategori, të shtunën do të luhen dy ndeshje, e pikërisht supersfida Goga Basket-Partizani, që nis në orën 17:00 në Arenën Sportive “Dhimitraq Goga” në Durrës, si dhe Tirana-Vllaznia në orën 19:00 në kryeqytet. Po të shtunën, në kategorinë e femrave, Grupi A, luhen Vllaznia-Flamurtari në orën 12:00 si dhe SH.K.B.F.Tirana-Elbasani në orën 16:00.
