ASNN – Korçarët, në basketboll për meshkuj, nuk kanë mundur të fitonin dje as ndeshjen e mbijetesës, pasi prisnin në shtëpi Elbasanin e vendit të parafundit në nivelin e dytë të Kampionatit Kombëtar të Basketbollit për Meshkuj. E në këto kushte kishin një mundësi të mirë për t’i lënë elbasanasit në vendin e fundit.

Por një gjë e tillë nuk ka ndodhur dhe, pas javës së 4-t, është Skënderbeu që e shikon veten në fund të renditjes me 3 humbje dhe asnjë fitore, ndërkohë që Elbasani dje ka shënuar fitoren e parë në këtë kampionat. Një ndeshje pa asnjë histori, nga fillimi në fund, teksa miqtë nuk e vunë në asnjë moment në diskutim fitoren.

10 minutat e para të ndeshjes nisin mirë për Elbasanin, që është më i saktë në gjuajtjet nga distanca dhe e mbyll këtë pjesë 13-21 në favorin e vet. Pritej që, në pjesën e dytë të reagonin korçarët, por një gjë e tillë nuk ka ndodhur dhe Elbasani e thellon edhe më shumë rezultatin dhe, përpara pushimit tabela elektronike shënon 22-44 në favor të tij.

Dy pjesët e tjera të takimit thjesht sa kanë qenë një formalitet, pasi të tretën, edhe pse e fiton Skënderbeu 22-17, diferenca është shumë e madhe dhe pas 30 minutash loje rezultati shkon në 44-61. Pjesa e fundit e ndeshjes ka pothuajse të njëjtën pamje, teksa Skënderbeu e fiton 28-22, por që është pa vlera, pasi në fund tabela shënon shifrat 72-83 në favor të Elbasanit.

Skënderbeu – Elbasani                   72-83

(13-21, 9-23, 22-17, 28-22)

Skënderbeu: Thanas, O.Simaku, Topi, Duci, Habip / Bala, S.Simaku, Treska, Bello, Gërmenji, Kristo, Qazimllari. Trajner: I. Nika

Elbasani: Biçoku, Leka, Mata, Balliu, Uruçi / Isufi, Guxha, Mata, Kishta. Trajner: B. Sinani

Gjyqtarë: A .Bejko (Tiranë), B. Tafilica (Shkodër)

Kampionati Kombëtar

i Basketbollit – Meshkuj

Kategoria e Parë

Java e 4-t

(5 nëntor 2016)

Të shtunën:

Tirana Eagles Basket – Partizani              44-66

Skënderbeu – Elbasani                              72-83

Apolonia                                                        pushim

Renditja

Nr.       Skuadra                                 N.        F.         H.        Psh-Pp           Pikë

1. Partizani                                4          4          0          327-199         8
2. Tirana Eagles Basket          3          2          1          197-177         5
3. Elbasani                                3          1          2          207-226         4
4. Apolonia                                3          1          2          153-238         4
5. Skënderbeu                          3          0          3          200-244         3