ASNN – Skënderbeu në basketboll për meshkuj dje ka shënuarfitoren e parë të sezonit, sukses që erdhi ndaj skuadrës së vendit të fundit në kategorinë e parë. Në fakt si Skënderbeu, por edhe Tirana Eagles, pas tre ndeshjeve të para, nuk kishin asnjë fitore. Dhe pas këtij suksesi korçarët janë ngjitur një shkallë, kurse Eagles ka mbetur në fundin e tabelës.
Duhet thënë se ndeshja ka qenë e bukur edhe pse pikët e shënuara kanë qenë të pakta. Fillimi i pjesës së parë nis mirë për korçarët që kryesojnë 7-0, por Tirana Eagles shënon 8-të pikë radhazi dhe kalon në epërsi 7-8. Në fund të 10-të minutave tabela elektronike shënon 11-8 për vendësit. Pjesa e dytë duket se ka qenë vendimtare për fitoren e korçarëve që fitojnë 20-10.
Dhe në pushim Skënderbeu futet në dhomat e zhveshjes me epërsinë 31-18. Kjo bëri që në 10-të minutat e treta, Skënderbeu të mendonte më shumë për të mbrojtur epërsinë e krijuar. Pavarësisht se Tirana Eagles e fiton këtë pjesë 13-18, rezultati vazhdon të mbetet në favor të Skënderbeut. Edhe pjesa e fundit ka thuajse të njëjtën pamje.
Dhe rezultati në fund të takimit shënon shifrat 61-54 për korçarët, që gjejnë fitoren e parë në nivelin e dytë të Kampionatit Kombëtar të Basketbollit për Meshkuj, që njihet si Kategoria e Parë.
Skënderbeu – Tirana Eagles 61-54
(11-8, 20-10, 13-18, 17-18)
Skënderbeu: Thanas, Simaku, Habip, Topi, Duci / Bala, Gj. Nika, Terolli, Qazimllari, J. Kristo, I. Kristo. Trajner: I. Nika
Tirana Eagles: Adili, Prodani, Tufa, Dashi, Zhullima / Zelaj, Nallbani, Ramaj, Lipo, Halilaj, Ambo, Bilbili. Trajner: K. Dedaj
Gjyqtarë: A. Dulçe, E. Tiko (Tiranë)
Kampionati Kombëtar
i Basketbollit – Meshkuj
Kategoria e Parë
Java e 5-të
(7 nëntor 2015)
Ardhmëria Basket – Elbasani 72-63
Skënderbeu – Eagles 61-54
Superior Klima pushim
Renditja
Nr. Skuadra N. F. H. Psh-Pp Pikë
- Ardhmëria Basket 4 4 0 282-174 8
- Superior Klima 4 3 1 251-179 7
- Elbasani 4 2 2 306-247 6
- Skënderbeu 4 1 3 192-300 5
- Tirana Eagles 4 0 4 177-308 4
