Fituesit në fuqi të ligës të Gadishullit janë mundur dje në vizitën bullgare, por një ditë “Jo” ka qenë edhe për Bashkimin e Prizrenit. E vetmia skuadër që ka fituar ishte Peja. Liga Ballkanike e Basketbollit për meshkuj, veprimtari në të cilin merr pjesë Tirana dhe që siparin e ka ngritur të hënën në mbrëmje në Pallatin e Sportit “Asllan Rusi”, dje ka luajtur të gjitha ndeshjet e javës së parë.
Ajo që bie në sy, kjo në mënyrë krejt të papritur, është fakti se SIGAL Prishtina, fituesja në fuqi e Ligës Ballkanike, e ka nisur këtë veprimtari me humbje. Një humbje shumë e thellë për skuadrën e kryeqytetit të Kosovës, ndërsa disfata e parë ka ardhur në Stara Zagora të Bullgarisë, atje ku vendasit e Beroes kanë fituar me 15 pikë diferencë, në shifrat 86-71.
SIGAL Prishtina, e cila është dhe kampione në fuqi e Kosovës, është pjesëmarrëse në Kupat e Evropës. Por për këtë skuadër ka munguar Drilon Hajrizi, i cili për shkak të përplasjeve që ka me grupimin e tifozëve kryeqytetas, “Plisat”, teksa ka qenë pjesë e Trepça Mitrovicës, nuk ka luajtur. Sepse nuk pranohet në skuadër për shkak të deklaratave të tij të mëparshme përpara se të vinte tek SIGAL-i.
Vendësit ishin skuadër më e mirë në pjesën e parë, të cilën e mbyllën në epërsi 22-20. E në pushim të gjysmës së parë ata kanë qenë në epërsi me një diferencë 11 pikësh, 49-38. Bullgarët me lojë të mirë vazhduan edhe në pjesën e dytë, duke fituar në fund me epërsi prej 15 pikësh, 86-71.
