ASNN – Luhet mesjavën e ardhshme për biletën e fundit të çerekfinaleve. Kupa e Shqipërisë në koshin e meshkujve nis mesjavën e ardhshme rrugëtimin e këtij sezoni, teksa do të zhvillohen të mërkurën dhe të premten ndeshjet e fazës së saj paraeliminatore. Kështu, veprimtaria e dytë e basketbollit të meshkujve, Kupa e Shqipërisë, nis mesjavën e ardhshme rrugëtimin e këtij sezoni, teksa do të zhvillohen të mërkurën dhe të premten ndeshjet e fazës së saj paraeliminatore.
Duke qenë se në Kampionatin e këtij sezoni, që zhvillohet me një kategori të vetme me 11 ekipe, 7 prej tyre, që u renditën në mbyllje të fazës së parë nga vendi i parë në të 7-tin, kualifikohen automatikisht për në çerekfinale. Këto skuadra janë Besëlidhja, Kamza Basket, Tirana, Vllaznia, Teuta, Apolonia dhe Flamurtari. Ndërsa 4 ekipet që u renditën nga vendi i 8-të, në të 11-tin, zhvillojnë midis tyre një fazë paraeliminatore, për të përcaktuar se cila do të jetë skuadra që merr biletën e fundit për në çerekfinale të Kupës së Shqipërisë.
Kështu, të mërkurën, më 10 janar 2024, luhen dy gjysmëfinalet e kësaj faze, aty ku Elbasani i vendit të 8-të përballet me Skënderbeun e vendit të fundit, atë të 11-të, në takimin që luhet duke nisur nga ora 17:00 në Pallatin e Sportit “Tomor Sinani”, ndërsa duke nisur nga ora 18:30, Partizani i vendit të 9-të përballet me Fieri Basketin e vendit të 10-të, në ndeshjen që do të luhet në Pallatin e Sportit “Asllan Rusi” në kryeqytet.
Ndërkaq, të premten, duke nisur nga ora 19:00, fitueset e këtyre dy çifteve do të përballen me njëra-tjetrën në sfidën finale. Dueli që do të përcaktojë se cila skuadër do të shkojë në çerekfinale, do të luhet në fushën e skuadrës që do të dalë fituese në duelin Elbasani-Skënderbeu.
