ASNN – Në prag të nisjes së sezonit të ri të Kampionatit Kombëtar të Basketbollit për Meshkuj, skuadrat po u japin dorën e fundit përgatitjeve, duke bërë edhe kolaudimet e nevojshme nëpërmjet ndeshjeve miqësore. E tillë ka qenë ajo e zhvilluar të mërkurën në mbrëmje në Arenën Sportive “Dhimitraq Goga” në Durrës, kur skuadra vendase, Goga Basket, ka mundur Partizanin me rezultatin 97-82.
Në fakt, kjo miqësore e Goga Basket me të kuqtë, vjen vetëm 4 ditë pasi ka zhvilluar një tjetër ndeshje miqësore me kampionen e Shqipërisë, Tiranën, ku skuadra private e koshit durrsak ka triumfuar me rezultatin e thellë 116-82. Ashtu si dhe në ndeshjen me bardhblutë, edhe me Partizanin, skuadra vendase, e drejtuar nga trajneri Nikola Milatoviç, ka qenë e plotë.
Dhe në përbërje të saj kanë qenë basketbollistët shqiptarë, Marsel Aliaj, Niko Thano, Klevis Isaku, Ilmi Pasha, Denis Veselagu, Herion Faslija, Mirald Dinoshi, Hidajet Elezi, Marvin Aliaj dhe Noel Bedo. Po kështu, pjesë e formacionit të Goga Basket për këtë ndeshje kanë qenë edhe 3 basketbollistë të huaj. Bëhet fjalë për amerikanët Aron Uilliams dhe Grifin Rame, si dhe malazezin Aleksandër Miliç.
Në krahun tjetër, trajneri i Partizanit, Arben Fagu, u ka dhënë mundësi të gjithë lojtarëve që ka patur në dispozicion, ku padyshim kanë spikatur Bruno Daliu, Mired Jani, Klein Strazimiri apo Algert Gjonaj. Takimi ka qenë kryesisht i barazpeshuar, por skuadra durrsaket ka qenë gjithnjë në epërsi, duke e fituar atë në fund me 15 pikë diferencë, 92-72.
Duhet theksuar se, në sezonin e ri të Kampionatit Kombëtar të Basketbollit për Meshkuj, ku do të debutojë në nivelin më të lartë, në Superligë, Goga Basket erdhi pasi dominoi sezonin e shkuar në Kategorinë e Parë. Tanimë pritet hedhja e shortit të sezonit të ri, për të parë edhe se me kë do ta nisin durrsakët kampionatin dhe cilat do të jenë datat e përballjeve me ekipet rivale.
