Partizani ka gjetur fitoren e parë të sezonit në kampionatin e basketbollit të meshkujve, teksa në fakt është e dyta e sezonit pas saj në turin çerekfinal të Kupës së Shqipërisë, 79-72 ndaj Superiorit. Dje të kuqtë kanë bërë lojën e tyre më të mirë në kampionat përballë një Flamurtari, që pasi është bindur se tashmë e ka në dorë vendin e 5-të, por dhe përballjen në “play-out” me vendin e dytë të Kategorisë së Parë, duket sikur i ka futur “gjumë” në këtë fazë të katërt.

Për rrjedhojë dje ka ardhur një humbje me 20 pikë diferencë për vlonjatët, që nuk të krijonin përshtypjen se është e denjë për ta mundur tre herë Partizanin. Florian Ismeti dhe Selimaj marrin përsipër ekipin dhe diferenca bëhet që në pjesën e parë, të cilën të kuqtë e kanë fituar 23-12. Në të dytën edhe për shkak të uljes në stol të Selimajt dhe të aktivizimit të elbasanasit Uruçi, Partizani ka luhatje në lojën e tij.

Aq sa Flamurtari arrin ta barazojë rezultatin në 29-29, falë një 3-pikëshi të Toskës dhe duke fituar pjesën e dytë 19-20 arrin të ngushtojë në 10 pikë diferencë, 42-32. Diferencë që është ruajtur dhe në pjesën e tretë, e cila është e barabartë 13-13 dhe në total 55-45. Partizani shpërthen në të katërtën dhe fiton me meritë 17-7, dhe krejt ndeshjen me rezultatin e përgjithshëm 72-52.

Ndërkohë, tabela elektronike vijon të kthehet në shqetësim. Sepse dje ka pasur dhe bllokim të kohës, aq sa disa herë është dashur ndërprerja e lojës nga gjyqtarët për të kërkuar kthimin e kohës aty ku ishte. Gjë që nuk ka ardhur ashtu siç kanë dashur gjyqtarët. Megjithatë përtej kësaj, ndërsa ende nuk po ia marrin dorën tabelës, Partizani ka bërë një fitore të bujshme dje.

Partizani – Flamurtari          72-52

(23-12, 19-20, 13-13, 17-7)

Partizani: Selimaj (17), F.Ismeti (21), Çela (5), Xhunga (5), Pylla (10) / Uruçi, Troja (8), Bardhi (2), Dervishi (4), Divitaraj. Trajner: E. Ismeti

Flamurtari: Kaso (7), Kollovi (12), Sotiri (3), Toska (10), Beko (8) / Gani, Dede (12). Trajner: V. Birçaj

Gjyqtarë: G. Basho, H. Trajer (Shkodër), G. Hoxha (Tiranë)

Kampionati Kombëtar

i Basketbollit – Meshkuj

Superliga

Java e 16-të

(1-2 prill 2016)

Të premten:

Kamza Basket – Vllaznia    67-65

Partizani – Flamurtari           72-52

Të shtunën:

Teuta – Tirana                       (18:00)

Renditja

Nr.       Skuadra                     N.        F.         H.        Psh-Pp           Pikë

1. Kamza Basket          16        14          2        1163-951       30
2. Vllaznia                     16        12          4        1122-980       28
3. Tirana                         15        11          4        1148-965       26
4. Teuta                          15          6          9        1110-1078     21
5. Flamurtari                  16          3        13          973-1258     19
6. Partizani                    16          1        15          959-1243     17