ASNN – Një ndër drejtuesit e Akademisë Goga Basket dhe njëherësh basketbollist, Marsel Aliaj, është shprehur për shtypin sportiv të ditës se skuadra private e Durrësit tani po mendon qartazi për titullin dhe se ecuria e deritanishme i jep shpresë ekipit të përmbushë me sukses këtë mision. Natyrisht, asgjë nuk do të jetë e lehtë, pasi fituesin e titullit e përcakton “play-off”-i, një fazë vendimtare e kampionatit ku katër më të mirat kanë shansin të duelojnë për titullin “kampion”.
“Skuadrën e karakterizon entuziazmi dhe dëshira për fitore, – është shprehur Marsel Aliaj për të përditshmen sportive “Panorama Sport”. – Fryma e grupit është pozitive dhe gjendja e ekipit në tërësi është shumë e mirë. Ky edicion është i jashtëzakonshëm për ne dhe nuk është rastësi që Goga Basket ndodhet në vend të parë, është një pozicion i merituar.” Më tej ai foli për trajnerin e ri Lazimi dhe qëndrueshmërinë e skuadrës në lojë dhe rezultate.
“Të gjithë ndihemi mirë me trajnerin, – vijoi Aliaj në qëndrimin e tij, – stërvitemi rregullisht dhe me ritëm të lartë. Melzini është trajner i ri, por mjaft i përgatitur dhe ajo që i jep epërsi është njohja e realitetit dhe mentalitetit të basketbollit shqiptar. Goga Basket është projektuar dhe ndërtuar që në fillim si skuadër me ambicie dhe sponsorët kanë pasur si synim që në fillim një ekip konkurrues dhe fitues. E dinim që s’do të ishte e lehtë sepse vinim nga kategoritë e ulëta.”
“Por është investuar dhe vijon të investohet, është punuar dhe vijon të punohet me ritëm të lartë, – theksoi basketbollisti durrsak. – Prandaj dhe arritjet tona janë të arsyetuara dhe të mëdha. Finalja e humbur në kupë përballë Teutës na tronditi pak, por na tregoi se duhet të jemi më të përgjegjshëm në punën tonë dhe na zgjoi nga “gjumi”, sepse pas atij momenti skuadra ka reflektuar si duhet. Është pak herët për të folur për “play-off”-in, por Goga Basket po vijon të mbajë ritëm të lartë stërvitor.”
“Ne po përgatitemi që të jemi gati për këtë fazë. Pres një garë shumë të fortë, por siç thashë ne jemi gati dhe të vendosur për të fituar titullin këtë sezon”, – ka përfunduar drejtori sportiv i Akademisë së Basketbollit “Goga Basket” dhe, njëkohësisht, lojtari i kësaj skuadre, Marsel Aliaj.
