ASNN – Pas largimit të Milatoviçit drejt Vllaznisë, durrsakët gjejnë emri e ri të stolit. Vijon qarkullimi i trajnerëve të koshit nga njëra skuadrës tek tjetra dhe të hënën është mësuar se Melzin Lazimi do të jetë trajneri i ri i skuadrës së Teutës në basketboll për meshkuj. Bëhet se ditur se tashmë skuadra “kampione” e Shqipërisë e ka mbyllur marrëveshjen me trajnerin kryeqytetas, i cili do të marrë kështu drejtimin e ekipit durrsak dhe do të nisë punën për edicionin e ri 2021-2022.
Kështu, bregdetarët nuk kanë humbur kohë dhe vetëm disa ditë pasi trajneri i sezonit të kaluar Nikola Milatoviç iu bashkua Vllaznisë, kanë arritur akordin me një tjetër teknik të rëndësishëm dhe fitues të basketbollit shqiptar. Gjatë sezonit të kaluar Lazimi ka drejtuar për disa muaj Goga Basket, skuadër me të cilën në sezonin 2018-2019 regjistronte rezultatin më të lartë në historinë e klubit, duke u shpallur “kampion” i Shqipërisë.
Në atë sezon, ekipi privat i Durrësit do të triumfonte në betejën finale pikërisht në derbin ndaj Teutës. Ndërsa gjatë kësaj vere, trajneri i ri drejtoi edhe Kombëtaren e Nën-18-vjeçarëve në turneun evropian të kësaj grupmoshe, me grupet E dhe F që u mbajt në Tiranë. Tashmë trajneri Lazimi do të kërkojë suksesin në skajin tjetër të qytetit bregdetar, tek Teuta. Menjëherë pasi Nikola Milatoviç mori rrugën për në Shkodër, presidenti i Teutës, Arqile Gorea, ishte vënë në kërkim të një trajneri tjetër.
Dhe, duket se tek Lazimi, durrsakët duken sa kanë gjetur profilin e trajnerit të tyre ideal, për të cilin edhe në të shkuarën kishin shprehur interes. Me zyrtarizmin e trajnerit të ri, radhën do ta ketë merkato e lojtarëve, teksa Teuta do të kërkojë përsëri të ndërtojë një skuadër pretendente për trofe, për të përsëritur sukseset e jashtëzakonshme të edicionit të kaluar, me bregdetarët që fituan si Kampionatin Kombëtar ashtu edhe Kupën e Shqipërisë.
