Tirana që nga 2 janari 2017 ka dalë në stërvitje dhe, siç konfirmon dhe i përgjithshëm i bardhebluve, Anxhelo Koleka, të gjithë lojtarët janë në gatishmëri të plotë të trajnerit Nikola Milatoviç. “Edhe Vogli është gati për t’iu bashkuar skuadrës, – ka thënë ai. – Për fatin e mirë, nisur dhe nga rikonstruksioni që pësoi salla sportive “Farie Hoti”, kushtet e stërvitjes kanë qenë optimale. Nuk them shumë ngrohtë, por të paktën normale për një stërvitje krahasuar me sallat e tjera.”
“Dhe ne mendojmë se skuadra do të japi më të mirën, – shpjegon Koleka, i cili kërkon nga skuadra të bëjë ato ndeshje të mira të fituara ndaj Trepçës së Mitrovicës dhe Pejës. – Tirana të jetë vetvetja, kjo është thelbësore për ne, sepse, si ndaj MKK Feni Industries, ashtu dhe Sutjeskës së Nikshiçit, që i humbëm në “Fahrie Hoti”, nuk kemi qenë vetvetja. Publiku mund të jetë një presion shtesë për skuadrën, por janë të gjithë lojtarë që e mbajnë presionin dhe mendoj se do të jetë më mirë për ta.”
Koleka nuk ka dëshirë të komentojë vendimet e Ligës Ballkanike, që i dha një pikë Trepçës së Mitrovicës, e cila e humbi në “tavolinë” 0-20 ndeshjen me Pejën për shkak të incidenteve në fushë. “Ne të shohim ndeshjen tonë, – ka këmbëngulur administratori bardheblu. – Të fitojmë ndaj Karposhit, në të kundërt asgjë nuk ka vlerë. Kështu që nuk kemi pse të komentojmë vendimet e Ligës Ballkanike. Jemi përgatitur fort për këtë ndeshje dhe shpresojmë ta nxjerrim me sukses”, ka përfunduar Koleka.
3 fitore ka arritur Tirana në Ligën Ballkanike në basketboll për meshkuj këtë sezon, teksa ka mundur dy herë, në shtëpi dhe në fushë të huaj, Trepçën e Mitrovicës, 78-66 dhe 74-68, si dhe Pejën në kryeqytet, 76-73. E po kështu ka pësuar dhe 5 humbje në 8 ndeshje.
