ASNN – Derbi helen, spektakël në parket. Supersfida e javës së 28-të të Euroligës së meshkujve, Olimpiakos-Panathinaikos, mbyllet 71-65. Veprimtaria më prestigjioze kontinentale e klubeve në basketboll për meshkuj, Euroliga, është rikthyer në Rrjetin e Radio-Televizionit Shqiptar me takimin më të spikatur të javës së 28-të. Ai ka qenë derbi i madh grek, midis Olimpiakosit dhe Panathinaikosit, që u mbyll me rezultatin 71-65.
I mbiquajturi “derbi i derbeve”, supersfida e dy rivaleve të përjetshme greke, midis Olimpiakosit dhe Panathinaikosit, ka qenë sfida më e spikatur e javës së 28-të të Euroligës së basketbollit për meshkuj. Kjo ndeshje, ka parë përmbysje të pabesueshme, teksa në 10-minutëshin e fillimit, skuadra vendase shënon vetëm 7 pikë, kundrejt 17 pikëve të shënuara nga Panathinaikosi. Por 10-minutëshi i dytë ka patur një tablo diametralisht të kundërt, pasi është Olimpiakosi që e fiton atë me shifrat 26-16,
Kjo ka bërë që të dy skuadrat të shkojnë në pushimin e madh midis dy gjysmave në barazpeshë të plotë, 33-33. Dhe skuadra vendase e ka ruajtur ritmin e lojës edhe pas daljes nga dhomat e zhveshjeve, pasi e ka fituar 10-minutëshin e 3-të, 15-9, duke kryesuar kështu pas një gjysmë ore loje me shifrat 48-42. 10-minutëshi i 4-t dhe i fundit ka qenë i luftuar, por Olimpiakosi ruan gjakftohtësinë dhe e mbyll atë në barazim 23-23, çka mjafton për ta fituar gjithë ndeshjen 71-65.
Të premten do të vijë në RTSH Sport, duke nisur nga ora 20:30, edhe një tjetër supersfidë e javës së 28-të, ajo midis Virtus Bolonjës dhe Realit të Madridit.
