ASNN – Ndonëse vëmendja të shtunën ishte përqendruar në Pallatin e Sportit “Ramazan Njala” të Durrësit, ku Teuta kryesuese u mund, për të dytën herë këtë sezon, nga Partizani, vetëm 7 km më në periferi, në Xhafzotaj, një tjetër skuadër e ka mbajtur lart flamurin e nderit të bregdetarëve. Goga Basket ka përfituar nga hapi fals i rivales bashkëqytetese dhe ka goditur pa mëshirë Vllazninë, duke e mundur me shifrat 131-86, ndonëse procesverbali i ndeshjes i ka dhënë dy pikë më pak shkodranëve.

Në fakt, ka qenë “rrugë me një kalim” takimi i zhvilluar në mjediset moderne të Arenës Sportive “Dhimitraq Goga” të Durrësit, pasi skuadra e drejtuar nga trajneri malazez Nikola Milatoviç dhe ndihmësi shqiptar, Bekim Abrazhda, ka kryesuar me shifrat 22-9 brenda 5 minutave të para dhe nuk e ka kthyer më kokën prapa. Për rrjedhojë, 10-minutëshi i parë ka përfunduar me epërsinë 17-pikëshe, 39-22, për skuadrën e Gogës, e cila as në atë të dytin nuk e ka ulur ritmin e lojës.

Për rrjedhojë, ekipi privat durrsak, i drejtuar nga presidenti Perikli Goga, ka shkuar në pushim të ndeshjes duke kryesuar bindshëm, 79-46, pasi 10-minutëshin e dytë e ka fituar 34-24. I 3-ti ka qenë thuajse identik, pasi Goga Basket e fiton edhe atë 34-22, duke e bërë pjesën e 4-t të lojës një formalitet. Edhe pse skuadra vendase e ul disi ritmin në pjesën e 4-t, teksa Milatoviçi u jep minuta të 12 lojtarëve që ka në organikë, Goga Basket e fiton edhe atë 24-16 dhe gjithë ndeshjen 136-84.

Tanimë Goga ndan kreun e renditjes së Superligës së basketbollit të meshkujve me Partizanin, me nga 11 pikë secila, një më pak sesa Teuta e vendit të 3-të. Por durrsakët e Milatoviçit mbajnë vendin e parë falë një pikëaverazhi më të mirë sesa të kuqtë kryeqytetas. Në takimin e javës së 7-të, Goga Basket udhëton drejt kryeqytetit për t’u ndeshur me kampionen në fuqi, Tiranën, të cilën e mundi 102-75 në ndeshjen e parë, të zhvilluar më 13 tetor 2018 në fushën e vet.

Kampionati Kombëtar

i Basketbollit – Meshkuj

Superliga

Java e 6-të

Të premten:

Kamza Basket – Tirana        86-82

Të shtunën:

Goga Basket – Vllaznia       131-86

Teuta- Partizani, 74-78

Renditja:

Nr.       Ekipi                           N.        F.         H.        Psh-Pp           +/-        Pikë

1. Goga Basket             6          5          1          584-472           99      11
2. Partizani                    6          5          1          503-423           80      11
3. Teuta                          6          4          2          538-413         129     10
4. Kamza Basket          6          2          4          444-526           -82      8
5. Tirana                         6          2          4          465-511           -46      8
6. Vllaznia                     6          0          6          417     603     -186      6