Enio Fjolla është magjia e Kamza Basket, ndërsa trepikëshi i tij në sekondat e fundit të ndeshjes i ka dhënë suksesin djemve të Adem Muhametajt, të cilët kështu kanë mbajtur kryesimin në basketbollin e meshkujve. Gëzim i paparë tek lojtarët dhe tifozët e Kamza Basket, të cilët janë të gjithë së bashku në parketin e sallës sportive në Bathore, por hidhërim tek shkodranët.

Keqardhje për atë që ka ndodhur në parket, sepse janë ndjerë të vjedhur sipas tyre nga gjyqtarët. E jo më kot ka ardhur dhe akuza e presidentit të Vllaznisë në basketboll për meshkuj, Sokol Dibra. “Në Shqipëri, – ka pretenduar Dibra, duke folur për “Sport Ekspres”, – nuk ka më basketboll. Është e kotë të merresh e të shpenzosh me këta gjyqtarë, të cilët mund të bëjnë gjithçka.”

Dhe në fakt fundi i ndeshjes ka qenë i tensionuar, sepse në një vendim të Kasëmit për top në vijën fundore për Kamza Basket pjesa e tifozëve të Vllaznisë kanë qenë të revoltuar. Pasi kanë pretenduar për hapa. Jo pak është pretenduar edhe për tavolinën në numërimin e faulleve, që në sekondat e fundit të lojës edhe për ta pasur topin në zotërim janë të zakonshëm, por dhe për minutazhin.

Për të gjitha këto arsye, ndonëse përmbysja e Kamza Basket, në kryendeshjen e basketbollit të meshkujve në javën e 16-të, është për t’u vlerësuar, Vllaznia ia ka faturuar humbjen gjyqtarëve. E përtej kësaj, ndeshja e djeshme ka qenë ndër më të mirat e basketbollit shqiptar të këtij sezoni. Sepse i pati të gjitha brenda. Emocionet, rivalitetin dhe tensionin deri në fund.

Dhe merita i takon të dy skuadrave, por mbi të gjitha Kamza Basket me Fjollën që shënoi trepikëshin e tij të artë dhe më shumë se magjik.

Kampionati Kombëtar

i Basketbollit – Meshkuj

Superliga

Java e 16-të

(1-2 prill 2016)

Të premten:

Kamza Basket – Vllaznia    67-65

Partizani – Flamurtari           72-52

Të shtunën:

Teuta – Tirana                       (18:00)

Renditja

Nr.       Skuadra                     N.        F.         H.        Psh-Pp           Pikë

1. Kamza Basket          16        14          2        1163-951       30
2. Vllaznia                     16        12          4        1122-980       28
3. Tirana                         15        11          4        1148-965       26
4. Teuta                          15          6          9        1110-1078     21
5. Flamurtari                  16          3        13          973-1258     19
6. Partizani                    16          1        15          959-1243     17