MKK Feni Industries, të mërkurën në mbrëmje, ka realizuar fitoren e saj të parë në këtë sezon në Ligën Ballkanike të Basketbollit për Meshkuj. Maqedonasit kanë fituar përballë Tiranës në Kavadarci në Sallën Sportive “Jasmin”, me 41 pikë diferencë, 98-57. Në përfundim të ndeshjes, trajneri i maqedonasve, Ljupko Malinkov do të deklaronte: “Para së gjithash më duhet t’i uroj lojtarët e mi për këtë fitore të madhe”.
“Ata dhanë të mirën e tyre gjatë gjithë lojës dhe unë jam me të vërtetë i kënaqur, -vijoi ai. – Ne fituam kundër një ekipi të madh, që një javë më parë fitoi me Trepçën e Mitrovicës. Është një kundërshtar që ka bërë përparime, ndërsa ne kemi luajtur jashtëzakonisht mirë si në mbrojtje, ashtu dhe në sulm. Dhe në këtë mënyrë e kemi merituar fitoren”.
Ndërkohë lojtari më i mirë i MKK Feni Industriers, Boban Stajikj, që ka shënuar 15 pikë, do të pohonte në përfundim të ndeshjes: “Ne e kemi nisur lojën shumë mirë dhe kemi luajtur sipas asaj që kishim ndërtuar më parë. Për fat të keq gjatë lojës kemi pasur disa ulje-ngritje, sidomos në pjesën e dytë, por më pas kemi treguar klasin tonë në fushën e lojës.”
“Gjithashtu unë jam i kënaqur që edhe lojtarët tanë të rinj kanë pasur shansin për të treguar potencialin e tyre”, – ka përfunduar ai.
