ASNN – Dedaj: “Ne kemi diskutuar dhe me presidentin e shoqatës e për këtë vendim nul do t’i drejtohemi të gjitha instancave më të larta”. Për trajnerin e Barleti-Eagles, Klarent Dedaj, që është konsultuar dhe me presidentin e Shoqatës Tirana-Eagles, Pirro Tanku, vendimi është nul. “Përsa kohë, – thotë Dedaj, – vendimi nuk ka shkuar me firmë dhe me vulë të njomë në dorën e presidentit tonë ai është “nul”. Bëhet “nul” edhe nga momenti që të paktën 1 deri në 10 ditë nga zbardhja e këtij vendimi ne duhet të kemi kohën e apelimit, pa thënë që duhet pritur zbardhja dhe në fletoren zyrtare, ashtu sikurse e kërkojnë ligjet e shtetit shqiptar.”
“Më thoni ju cila është fletorja zyrtare e Federatës Shqiptare të Basketbollit? – ka vijuar ai. – Në çfarë neni të statutit apo të rregullores mbështetet vendimi që në mes të garës duhet të penalizosh një skuadër, e cila vetëm në janar ka dhënë 200.000 lekë të rinj nga detyrimet që duhet? Ti nuk mund të më thuash tani që ke dhe të prapambetura. Ne këtë vendimi e quajmë nul dhe për këtë do t’i drejtohemi Gjykatës së Arbitrazhit Sportiv, Gjykatës Administrative për prishje të imazhit, Gjykatës së Lartë. Jo vetëm kaq, por do t’i drejtohemi me letër të hapur Presidentit të Republikës, Ilir Meta, kryeministrit Edi Rama.”
“Po kështu, edhe presidentit të Federatës Shqiptare të Basketbollit, Demirel e gjithkujt për të bërë të ditur atë çfarë gatuan ajo Federatë dhe ai sekretar në kurrizin tonë, – ka këmbëngulur Dedaj. E gjitha bëhet se më kërkojnë të shtoj lojtarë moshash, që s’janë të mitë, apo të paguaj për lojtarë të cilët nuk janë të mitë. Ata kanë ardhur dhe nesër kur të ngrihet ekipi i tyre do të ikin kaq. Më vjen keq, Federata Shqiptare e Basketbollit është kthyer në një reminishencë e 1997-ës, atje ku komandojnë të fortit. Rregullat janë të gjithë njësoi dhe nuk mund të bëhet ca të “nënës” e ca të “njerkës”. Këtë nuk e pranojmë dhe vendimi për të gjithë është nul përderisa ne nuk jemi dëgjuar askund.”
“Madje po ju themi që ndeshja e jonë me Vllazninë është kuotuar në baste, ndërsa morën lekët nga basti dhe sajuan vendimin. E Federata duhet t’i ndalë këto kuotime, kurse në fakt ne kemi qenë nën emrin e Tiranës”, – ka përfunduar trajneri i Barleti-Eagles, Klarent Dedaj .
