ASNN – Tirana Eagles Basket (TEB) dhe “Barleti Grup” ka rënë dakord për një bashkim shoqatash dhe tashmë Barleti-Eagles nuk do jetë me një provë apo një projekt, por realitet. “Sot Barleti grup ka mbështetur e sponsorizuar TEB, duke i shlyer debinë me FSHB-në e praktikisht duke bërë më shumë sesa një sponsorizim të thjeshtë, por duke siguruar vazhdimësinë e Shoqatës “Tirana Eagles Basket””, – thuhet në një njoftim të shpërndarë për shtyp nga shoqata në fjalë.
“Pikërisht për këtë, duke qenë i vetmi mbështetës dhe, jo vetëm këtë sezon, por edhe më parë drejtuesit dhe strukturat drejtuese të TEB kanë rënë dakord që t’i thonë po projektit të bashkimit të shoqatave tona e të përfaqësojnë Universitetin “Marin Barleti” edhe në basketbollin e meshkujve me skuadrën “Barleti-Eagles”, – vijon më tej njoftimi. – Pra, UMB-ja tashmë do ketë volejbollin e femrave dhe nga 8 shkurti me fillimin e gjysmës së dytë të sezonit aktual e në vazhdimësi, edhe skuadrën e përbashkët, Barleti -Eagles.”
“Tashme projekt-ideja e sezonit të kaluar, e Pro-Rektorit të Universitetit “Marin Barleti”, Prof. Artan Shytaj, është fakt dhe do të kristalizohet edhe në termat teknikë e ligjorë e do të marrë jetë me fillimin e fazës së dytë, – thekson njoftimi i TEB-së. – Objektivi i skuadrës është i qartë të vazhdojë paraqitjen e gjysmës së parë, të menaxhojë dhe konsolidojë vendin e parë e të shpallet “kampion” në Kategorinë e Parë dhe të rikthehet tek më të mirët, në Superligë.”
Teksa nisja e fazës së dytë po afron dhe “Shqiponjat” e UMB-së janë në epilogun e përgatitjeve të fazës së dytë të kampionatit. Skuadra është e plotë ardhjet e Dejvis Pyllës e Marlind Laçit, që i bashkohen kështu grupit të përbërë nga Enea Gozhdarit, Orest Shytajt, Edson Gjokës, Besjan Selimajt, Arsen Dervishit, Elidjon Dedajt, Françesk Nikollit, Mirsad Adilit, Marlon Nasit dhe Lusien Kalas.
Por edhe më të rinjve Vasil Becolli Semirald Senja e Pëllumb Bisheva kanë sjellë përforcim të ekipit duke konsoliduar të gjitha pozicionet. “Aktualisht thjesht kemi filluar numërimin mbrapsht deri në fillimin e fazës së dytë”, – përfundon njoftimi i shpërndarë për shtyp nga Shoqata “Tirana Eagles Basket”.
