Liga Ballkanike e Basketbollit të Meshkujve (SIGAL UNIQA BIBL) këtë javë ka pasur edhe emrat e dy shqiptarëve. Njëri në fushën e gjykimit dhe tjetri në fushën e vëzhgimit dhe të komisarit të ndeshjes me stemën ndërkombëtare. Bëhet fjalë për Ervin Koçin, i cili ka qenë arbitër i dytë dje në Stara-Zagora, atje ku skuadra vendëse Beroe ka pritur Bashkimin e Prizrenit. Një ndeshje që është fituar nga skuadra bullgare 90-80 (21-23, 26-20, 19-20, 24-17).
Për t’u evidentuar është fakti se ka luajtur me Bashkimin e Prizrenit lojtari i kombëtares shqiptare, Endrit Hysenagolli, i cili në 15 minuta aktivizim ka realizuar vetëm dy pikë. Në këtë ndeshje gjyqtar i parë ka qenë rumuni Siprian Stoica, kurse i tretë maqedonasi Aleksandar Pavlo dhe vëzhgues i ndeshjes bullgari Kamen Toshev. Për Koçin kjo është ndeshja e tretë në Ligën Ballkanike, teksa më parë ka qenë më 13 tetor 2015 në takimin Bashkim i Prizrenit-Peja 82-73.
Dhe më pas më 9 shkurt, së bashku me ndërkombëtarin tjetër Gentian Cici, ka qenë në takimin Teodo-Beroe Stara-Zagora 76-66. Ndërkohë po dje në mbrëmje në Ligën Ballkanike ka qenë në rolin e vëzhguesit për të pestën herë këtë sezon edhe Stavri Bello. Bëhet fjalë për ndeshjen e luajtur në Pallatin e Sportit “26 Prill” i Gjevgjelias mes Kozhuvit vendës dhe bullgarëve të Levskit 2014. Këtë ndeshje e ka fituar thellësisht skuadra e Kozhuvit, 99-72 (32-15, 11-29, 26-14, 30-14).
Bello ka qenë vëzhgues për treshen malazeze Zoran Sutuloviç, Zdravko Ruteshiç dhe Milosav Kaludjeroviç. Në katër ndeshjet e para, Bello vëzhgues në Ligën Ballkanike ka qenë më 13 tetor 2015, Bashkimi i Prizrenit-Peja 82-73. Më pas më 11 nëntor 2015, Peja-BC Levski 2014 75-68. Për të vijuar më pas 9 shkurt 2016 SIGAL Prishtina-BC Levski 2014 89-66 dhe më 10 shkurt 2016 Peja-Kozhuv 77-76.
Parë kështu me pesë ndeshje në Ligën Ballkanike, një në “FIBA Europe Cup” për meshkuj, një në “Euro Cup” për femra dhe një në kualifikueset e Kampionatit Evropian 2017 për femra, Bello mbetet gjithnjë në qendër të vëmendjes së ndërkombëtarëve. Sikurse ndodhe dhe me tre gjyqtarët shqiptar, Cici, Koçi dhe Hoxhaj. Pra në tërësinë e vet, qoftë në fushën e gjykimit, por dhe në atë të vëzhgimit, basketbolli shqiptar vlerësohet. Dhe kjo nuk është pak.
