Kombëtarja gati për miqësoret. Për shkak dëmtimesh janë larguar deri më tani Marsel Aliaj, Herjon Faslija, Dod Lekndreaj dhe Julian Hamati. Të gjithë të tjerët të gatshëm për miqësoret në Qipro dhe Estoni. Kombëtarja e basketbollit të meshkujve, që është duke u përgatitur për Eliminatoret e Kampionatit Evropian 2017, tashmë është gati për ndeshjet e saj miqësore. Siç është thënë dhe më parë, Shqipëria do të jetë në Qipro nga data 17, deri më 22 gusht 2016, përballë skuadrës vendëse, Estonisë dhe Katarit. Ndërsa nga data 23, deri më 27 gusht 2016, do të jetë në Estoni po përballë ekipit vendës, Izraelit dhe Ukrainës.
Për Genti Laskun, lojtarin e Tiranës, Kostantinides është trajner shumë i përgatitur me një filozofi të lojës së tij për të marrë rezultatin. “Më duhet të them. – thotë Lasku për “Sport Ekspres”, – se në kaq vite që kam unë në ekipin kombëtar, duke e marrë që tek moshat, por duke pasur parasysh sa trajnerë kam kaluar, të huaj e vendës, mendoj se ky është më i përgatituri. Ka një filozofi të lojës së tij që kërkon të zbatohet me përpikëri. Është trajner më shumë mbrojtës, sepse vetëm kështu e do ta arrijë dhe fitoren. Për të nuk ka rëndësi se si arrihet, por vetëm me një mbrojtje të fortë dhe të disiplinuar mund të merret fitorja dhe me një pikë.”
“Një filozofi që mua më pëlqen dhe më duket e mirë, – ka vijuar ai. – Ne duhet të jemi me objektiva modeste duke marrë parasysh dhe kundërshtarët që do të kemi përballë, sepse Gjeorgjia dhe Mali i Zi janë të nivelit të Spanjës. Pak më poshtë është Sllovakia, por më lart se ne. Kështu që duke llogaritur dhe mungesat, atëherë ne duhet të bëjmë atë lojën tonë sipas filozofisë së tij, të marrim sa të mundemi e pastaj të mendojmë për të ardhmen”. Lasku vlerëson faktin që Kostantinidesi ka një staf të gjerë nga pas. “Sepse kështu është më i qetë të bëjë anën taktike të mbrojtjes dhe të sulmit dhe secili merret me punën e tij që duhet”, – thotë basketbollisti bardheblu.
“Pasi vetëm në Shqipëri një trajner bën përgatitësin atletik, mjekun, merret me uniformat dhe biletat e avionit dhe të tjera këto, – vijon ai. – Duhet të mësohemi të jemi kështu siç është ndërtuar tani kombëtarja.” Nga pas Konstantinidesit janë ndihmësit Afrim Bilali, Endri Rumani dhe Albert Sylejmani, si dhe dy fizioterapistët Eno Mirushi dhe Sabahat Kastratri. E ndërkohë jemi në prag të dy turneve miqësorë dhe Lasku pohon: “Një kombëtare pa ndeshje miqësore nuk mund të shkojë në ndeshjet zyrtare. Sidomos ne që jemi kombëtare heterogjene me lojtarë kampionati dhe të ardhur nga jashtë. Pra, 5-6 miqësore ndihmojnë skuadrën të konsolidohet.”
“Aq më tepër që bota i mbyll që një vit përpara, – shton ai. – Unë them se na shërbejnë këto miqësore”. E duke mbyllur përveç të dëmtuarve, Lasku llogarit dhe mungesat e Kuqos, Ndojës dhe Bushatit. “Sepse sa më shumë lojtarë të jenë, aq më të lehtë e bëjnë seleksionimin e kombëtare. Sidoqoftë, unë mendoj që jemi në një rrugë të mirë, shpresojmë të bëjmë ndeshje të mira si në miqësore, ashtu dhe në Eliminatore”, ka përfunduar lojtarin e Tiranës, Genti Lasku.
