Dje në mesditë, ashtu sikurse ka qenë e paralajmëruar në rregulloren e Kupës së Shqipërisë, në mjediset e Federatës Shqiptare të Basketbollit është hedhur shorti i raundit çerekfinal. Të mërkurën e kaluar janë luajtur ndeshjet eliminatore, sidomos për meshkuj teksa janë përplasur katër ekipet e Kategorisë së Parë. Atje ku Eagles Basket ka mundur Skënderbeun, 66-59, kurse Partizani, Apoloninë 72-46.

Ndërkohë, është luajtur dhe për femra e Elbasani pat mundur Apoloninë, 89-76. Të 3 këto ekipe, së bashku me Elbasanin e meshkujve, i janë bashkuar ekipeve të elitës së basketbollit shqiptar. Më 8 dhe 9 nëntor 2016 do të luhen çerekfinalet e femrave, kurse më 15 dhe 16 nëntor 2016, ato të meshkujve. Dhe, më pas, më 27 dhe 28 nëntor do të jenë finalet e Kupës së Shqipërisë.

Fituesit në fuqi të Kupës së Shqipërisë në basketboll janë Kamza Basket për meshkuj dhe Flamurtari për femra. Sakaq në turin çerekfinal spikasin vetëm përplasjet e meshkujve, atje ku në qendër të vëmendjes do të jenë Tirana-Kamza Basket, Vllaznia-Partizani, po pse jo dhe Ardhmëria Basket-Tirana Eagles Basket.

Një sfidë kjo e fundit ku skuadra e Afrim Bilalit, pa ia hequr merita ekipit të Juri Dashit, ka shansin e artë që në vitin e parë të pjesëmarrjes së saj në elitën e basketbollit shqiptar të jetë mes katër më të mirëve në Kupën e Shqipërisë. Për femra, atje ku përqindja e surprizave është fare e vogël, që tani mund të thuhet se katërshja gjysmëfinaliste do të jetë Flamurtari, Goga Basket, Tirana e Studenti.

Federata Shqiptare e Basketbollit ka bërë të ditur se shorti i gjysmëfinaleve të Kupës së Shqipërisë do të hidhet më 21 nëntor 2016.

Kupa e Shqipërisë

Basketboll – Femra

Shorti i çerekfinaleve:

8 nëntor 2016:

Flamurtari – Elbasani          ora 16:00

Goga Basket – Vllaznia      ora 18:00

9 nëntor 2016:

Tirana – Skënderbeu          ora 15:00

Studenti – Kamza Basket   ora 19:00

Kupa e Shqipërisë

Basketboll – Meshkuj

Shorti i çerekfinaleve:

15 nëntor 2016:

Vllaznia – Partizani                                                 ora 18:00

Ardhmëria Basket – Tirana Eagles Basket          ora 19:00

16 nëntor 2016:

Teuta – Elbasani                                                      ora 19:00

Tirana – Kamza Basket                                           ora 19:00