ASNN – Ka kaluar një jetë me Partizanin, me shumë suksese, por edhe me ekipe të tjera më vonë, si të basketbollit të meshkujve, ashtu edhe atë të femrave. Dhe Astrit Greva patjetër bëhet nostalgjik në këtë 50-vjetor të përballjes historike të Partizanit me Oransodën. Natyrshëm ka shumë gjëra që, sipas tij, e bënte të veçantë Partizanin e basketbollit të atyre viteve.
“Do të duket sikur lavdërohem, por është fakt i pamohueshëm që në atë kohë punohej fort, – thotë Greva. – Edhe sot ka talente, madje shumë më tepër, ka të rinj shtatlartë e cilësorë, por mungon puna që bënim ne. Sot punojnë 2 orë në ditë, ne punonim 5 orë në ditë. Jo vetëm kaq, stërvitjet nuk bëheshin sa për statistikë, por me seriozitet maksimal.”
“Nuk ka qenë vetëm Partizani në basketboll, por edhe Dinamo e volejbollit të femrave që shkoi deri në 4-shen e Evropës, – vijoi 82-vjeçari. – Unë kujtoj këtu dhe një rast, kur lojtari ka ardhur në ndeshje dhe pas ndeshjes ka shkuar në ceremoninë martesore, deri këtu ka qenë përkushtimi ynë. Sot kushtet janë ku e ku më të mira, por nuk punohet në ato nivele përgatitore. Mungon disiplina, serioziteti dhe sakrifica.”
Madje atij i vjen keq vetëm për basketbollin e femrave, që ka rënë në një gjendje të mjerueshme. “Jemi më keq se në periudhën kur vajzat ishin ende me kilota, – këmbëngul trajneri veteran. – Ndërsa për djemtë situata ndryshon. Ka talente, ka plot të rinj të shkëlqyer, rivalizojmë dhe në përgjithësi situata është e mirë. Edhe puna e federatës tek djemtë ndihet, sidomos me pjesëmarrjet e moshave në veprimtaritë ndërkombëtare, një punë e madhe dhe pozitive që duhet të vazhdojë.”
“Por problem janë lojtarët e huaj, ka shumë dhe kjo krijon shqetësim për të rinjtë vendas që nuk gjejnë hapësirë. Lojtarët e huaj sjellin përvojë, kanë cilësi dhe rrisin nivelin, por shkaktojnë dëm për basketbollin vendas. Por kam shpresë që ekipi kombëtar do të jetë i fortë në vitet në vazhdim. E them këtë sepse kemi goxha talente”, – ka përfunduar Greva.
