ASNN – Përmirësimi i rezultateve të Flamurtarit në basketboll për femra gjatë javëve të fundit, është dëshmi e një ripërtëritje të fortë në një kohë të shkurtër, duke kaluar jo vetëm krizën por njëherësh duke rritur pretendimet edhe për këtë edicion. Nën drejtimin e trajnerit Viron Toska, Flamurtari e kishte premtuar këtë rikthim dhe fitorja e fundit me SH.K.B.F Tiranën e trajnerit Erdal Borova. Nuk ishte thjesht hakmarrje për disfatën që vajzat bardheblu i kishin shkaktuar në fazën e parë në Vlorë.

Por ishte një fitore që e afron me kryesuesit dhe tani lakmon vendin e parë. Me një merkato të fortë në janar, sikurse kanë pretenduar, Flamurtari mund të kthehet si pretendent kryesor për titullin. Në fillim të sezonit nuk e morën seriozisht, e quajtën të mbaruar skuadrën e trajnerit Toska. Por ecuria e javëve të fundit dhe qëndrueshmëria bindin që Flamurtari është ende i fortë dhe një pengesë për skuadrat e tjera që të arrijnë maksimumin.

Ndërkohë, humbja e parë e SH.K.B.F. Tiranës në javën e 10-të të Kategorisë së Parë, dëshmoi se nuk ka asnjë skuadër të pathyeshme. Ajo që mund të shihet me skepticizëm ka lidhje me skuadrën kryeqytetase, që pretendon se nuk financohet dhe stërvitet në një fushë shkolle për shkak të pamundësive. Në një dalje  në median e shkruar sportive të para pak ditëve të kapitenes Erta Bujari vihej në diskutim e ardhmja e skuadrës, teksa bëhej thirrje  për ndihmë nga sponsorët.

Edhe pse SH.K.B.F Tirana mban ende vendin e parë me 19 pikë, afrimi i Flamurtarit në vend të dytë me 17 pikë, pra vetëm dy pikë më pak, jo vetëm ka hapur garën për kreun, por njëherësh ka rikthyer vlonjatet si favorite, ndërsa për Tiranën e Borovës duket se ka shenja krize të një natyre financiare. Sidoqoftë, merkato e dimrit mund të prodhojë surpriza, pasi të gjitha ekipet pretendojnë të bëjnë goditje në treg me lojtare të huaja. E thënë ndryshe, Flamurtarit, duket se po i buzëqesh sërish fati.

Renditja

Nr.       Skuadra                     N.        F.         H.        Psh-Pp           +/-                   Pikë

1. SH.K.B.F. Tirana      10        9            1        867-674         193                19
2. SH.B.F. Tirana          10        7            3        794-613         181                17
3. Flamurtari                  10        7            3        764-666            98                 17
4. Vllaznia                     10        5            5        665-724           -59                15
5. Studenti                     10        2            8        602-780         -178                12
6. Elbasani                    10        0          10        612-867         -245                10