ASNN – Shifrat spostojnë epiqendrën e koshit nga Vlora në Tiranë, SH.K.B.F. e Erdal Borovës sulmi më i mirë, vlonjatet bien në vend të tretë. Diferencën në sport e bëjnë detajet. Është aq e vërtetë kjo sa më mirë se çdo gjë tjetër flasin shifrat në basketbollin e femrave. Dy skuadrat e Tiranës, SH.K.B.F. Tirana dhe SH.B.F. Tirana, në këto tri javë të para të kampionatit kanë shtangur Flamurtarin “kampion” në fuqi, duke e zbritur në vend të tretë dhe duke i kujtuar se ky sezon nuk është si të tjerët dhe se epiqendra e zhvillimeve basketbollistike në koshin e femrave po zhvendoset nga Vlora për në kryeqytet.
“Albaniasport.net” merr për bazë në këtë analizë të shkurtër një tregues të thjeshtë, por mjaft domethënës për ecurinë e garës dhe renditjen e skuadrave. Ka të bëjë me pikavarazhin. Kur shikon me kujdes tabelën e renditjes dhe pikavarazhit, kupton se SH.K.B.F. Tirana ka sulmin më të mirë në kampionatin elitar të femrave, me një diferencë të ndjeshme pikësh nga ndjekësit. Kështu, Tirana e drejtuar nga trajneri Erdal Borova ka realizuar në tri ndeshje të luajtura 250 pikë, pra mesatarisht 83 pikë për ndeshje. Rivalja e saj në kryeqytet, SH.B.F. Tirana, e drejtuar nga homologia Mirza Alibegaj, renditet e dyta në kampionat.
Por jo vetëm në renditje, por edhe sa i takon sulmit është e dyta sepse ka realizuar 231 pikë, ose 77 pikë për ndeshje. Flamurtari “kampion” në fuqi nuk e ka më vrullin e sezoneve të shkuara dhe ka realizuar në 3 takimet e para në kampionat 219 pikë, ose 73 pikë për ndeshje. E parë në këtë këndvështrim, SH.K.B.F. Tirana realizon mesatarisht 10 pikë për ndeshje më shumë sesa Flamurtari dhe ky tregues është mjaft domethënës për forcën, pozitat dhe pritshmëritë e skuadrave. Këto tri skuadra të kreut na tregojnë se janë dhe rivale për titull. Vllaznia e vendit të katërt është një skuadër e ndërmjetme.
Midis grupit të ekipeve që pretendojnë titullin dhe atyre që luftojnë në fundtabelë, diferencat mes të cilave janë shumë të mëdha. Shkodranet kanë shënuar në 3 javët e para 184 pikë, ose 61 pikë për ndeshje. Dy skuadrat e fundit Elbasani dhe Studenti, kanë pikavarazh negativ, sepse shënojnë jo më shumë se 40 pikë për ndeshje, ndërsa pësojnë mbi 50 pikë për ndeshje. Ndryshe nga sulmi, mbrojtja na sjell një panoramë të çuditshme në radhët e skuadrave kryesuese. Sepse, 4 vendet e para, kanë mbrojtje pak a shumë të njëjtë. Kështu, SH.K.B.F. Tirana ka pësuar 185 pikë, SH.B.F. Tirana ka pësuar 186 pikë dge Flamurtari 187 pikë.
Kurse Vllaznia e vendit të katërt në renditje, çuditërisht, ka mbrojtjen më të mirë me 183 pikë. Të katër këto ekipe pësojnë 61-62 pikë për ndeshje, një tregues sa interesant aq dhe domethënës për vazhdimësinë. Pas këtyre shifrave mund të konkludohet lehtë se diferencën për renditjen nuk e ka bërë mbrojtja, por sulmi i bardhebluve të Borovës, që shënon dukshëm më shumë se rivalët e saj në kampionat dhe është agresiviteti i kësaj skuadre në lojën sulmuese, motivimi dhe njëherësh përkushtimi i vajzave që e bëjnë këtë skuadër një pretendente serioze për titullin “kampion”. Jo rastësisht në këto 3 javë të para, SH.K.B.F. Tirana ndodhet në vend të parë me 6 pikë, duke lënë pas SH.B.F. Tiranën dhe Flamurtarin, me 5 pikë secila.
