ASNN – Janë zhvilluar në mesjavë takimet e javës së 8-të të Ligës Unike në basketbollin e femrave, që është mbyllur me një rezultat disi të papritur, teksa Partizani ka mposhtur dje në “Asllan Rusi” skuadrën e Penzës me shifrat 94-91, pas një sfide shumë interesante me përmbysje dhe ripërmbysje. Kryeqytetaset e Ledina Koçit, të cilat vijojnë të jenë një ekip me përbërje tërësisht shqiptare, kanë bërë një nga ndeshjet më të bukura sezonale, duke marrë me meritë të plotë triumfin e dytë në eventin mbarëkombëtar.
Nga ana tjetër, Penza, ndonëse me investime shumë më të mëdha dhe me disa lojtare të huaja në formacion, u shfaq e pafuqishme në parket. Pejanet edhe pse arritën të rikuperonin një disavantazh prej 20 pikësh, madje duke kaluar në 10 pikë epërsi në mesin e pjesës së 4-t, nuk arritën që ta ruajnë epërsinë. Dajana Baraj me 32 pikë, 4 kërcime dhe 5 asiste, si dhe Aida Palko me 21 pikë e 6 kërcime ishin lojtaret më të mira në këtë takim për Partizanin. Ndërkaq, Liga Unike e koshit të femrave i ka zhvilluar të mërkurën ndeshjet e para të javës së 8-të të sezonit të rregullt.
Flamurtari dhe Bashkimi kanë marrë fitore bindëse në këtë veprimtari mbarëkombëtare, teksa kanë mposhtur në fushë të huaj përkatësisht Tiranën dhe Prishtinën. Kështu, vlonjatet vazhdojnë të shkëlqejnë në ligën e përbashkët Kosovë-Shqipëri, duke u pozicionuar në vendin e parë të renditjes. Suksesi i 6-të sezonal erdhi mbrëmjen e së mërkurën kundër Tiranës në Sallën Sportive “Farie Hoti”, teksa Flamurtari triumfoi me rezultatin e thellë 63-104. Lojtarja më e mirë e takimit ishte Samra Omerbashiç.
Ajo ishte thjesht e papërmbajtshme, duke regjistruar bilance dyshifrore me 40 pikë të realizuar dhe 17 topa të fituar në tabelë. Shkëlqeu edhe Laura Xhonson, gjithashtu me bilanc dyshifror, teksa realizoi 34 pikë dhe fitoi 14 topa në tabelë. Për Tiranën, efikasitetin më të lartë në sulm e pati Enisa Qosja me 23 pikë. Ndryshimi në stol duket se ka ndikuar për mirë në radhët e Flamurtarit, teksa trajnerja Elona Hasanaj, në harkun kohor të një jave, ka arritur të regjistrojë 3 fitore të thella ndaj ekipeve kryeqytetase.
Fillimisht kundër Partizanit në Ligën Unike, më tej ndaj Tirana Barletit në kampionat, e tashmë sërish në evenimentin mbarëkombëtar kundër Tiranës. Ndërkaq, derbi i Kosovës u fitua nga skuadra prizrenase, që triumfoi me rezultatin e thellë 65-87 (14-29, 14-16, 18-21, 19-21). Bashkimi u shfaq superior në të gjitha pjesët e ndeshjes përballë një Prishtine që nuk ishte në gjendje për të reaguar. Vendimtare rezultoi pjesa e parë e sfidës, të cilin miket e fituan me plot 15 pikë diferencë. Kjo ishte fitorja e 5-të në 8 ndeshje për Bashkimin.
Ndërsa Prishtina regjistroi disfatën e 4-t në 7 takime. Për sa u përket paraqitjeve individuale, te Bashkimi spikatën D’Asia Çejmbërs me 28 pikë, 10 topa të zotëruar në tabelë, si dhe 7 pasime për kosh, si dhe Monikë Koker, me 21 pikë dhe 16 topa të zotëruar në tabelë. Ndërkaq, për Prishtinën më e mira ishte Sarah Mgbeike me 12 pikë e 14 topa të zotëruar në tabelë.
