ASNN – Skënderbeu në basketboll për femra e ka mbyllur me humbje sezonin 2015-2016, teksa dje, në javën e fundit, nuk ka arritur të mposhtë në shtëpi as Studentin. Me këtë fitore, kryeqytetaset e mbyllin këtë sezon në vendin e 5-të me 28 pikë, ndërkohë që Skënderbeu e mbyll në vendin e parafundit me 27 pikë. Pa Eda Llazarin, lojtaren kryesore të korçareve, ky Skënderbe e ka pasur vërtet të vështirë të bëjë diçka në shumicën e ndeshjeve, ndërkohë që objektivi nuk u arrit nga korçaret.

Gjithsesi, edhe dje në ndeshjen e javës së fundit, Skënderbeu reziston ndaj mikeve, por vlen të theksohet se Studentit këtë fitore ia ka dhënë një korçare, siç është Ornela Lalaj, lojtarja e ekipit tonë kombëtar që jo vetëm shënoi 26 pikë, duke qenë pikëshënuesja më e mirë, por ishte edhe më e mira në fushë. Ndeshja nis e barabartë me gabime nga të dy ekipet dhe 10 minutat e para mbyllen 13-15 për Studentin. Në pjesën e dytë korçaret ndryshojnë diçka, por nuk fitojnë më shumë se një pikë diferencë 16-15.

Dhe përpara pushimit tabela elektronike shënon rezultatin 29-30. Në pjesën e 3-të sërish është Lalaj që shkëlqen për mikeshat dhe i besohet gjithë loja asaj, ndërkohë që për Skënderbeun, El. Papa është në një ditë vërtet të mirë. 18-21 fitohet pjesa e 3-të po nga kryeqytetaset dhe rezultatin sërish është i ngushtë. Në pjesën e fundit, Skënderbeu zgjohet disi dhe rezultati shkon pikë për pikë deri në fund. Pas shifrave 63-65 janë më të sakta në fund mikeshat që shënojnë fitoren 65-68 dhe në këtë mënyrë largohen me dy pikë nga Korça.

Skënderbeu – Studenti       65-68

(13-15, 16-15, 18-21, 18-17)

Skënderbeu: Haris (25), Doja, El. Papa (18), S. Papa (11), Gjika (4) / Toska (7), Pëllumbi, Aliu, Shallo, Jahillari, Hysenllari. Trajner: Em. Papa

Studenti: Metani (24), Lalaj (26), Çomollari (6), Halili (7), Naçollari (3) / Shima (2), Baraj, Jani, Kica. Trajnere: F. Mitku

Gjyqtarë: E. Koçi, E. Allaraj (Tiranë)

Kampionati Kombëtar

i Basketbollit – Femra

Java e 21-të

(30 prill 2016)

Flamurtari – Goga Basket               54-67

Tirana – Elbasani                            95-79

Vllaznia – Kamza Basket               88-52

Skënderbeu – Studenti                  65-68

Renditja

Nr.       Skuadra                     N.        F.         H.        Psh-Pp           Pikë

1. Flamurtari                  21        20          1        1615-1282     41
2. Goga Basket             21        17          4        1796-1318     38
3. Tirana                         21        14          7        1577-1480     34
4. Vllaznia                     21        12          9        1504-1425     33
5. Studenti                     21          7        14        1209-1468     28
6. Kamza Basket          21          6        15        1150-1320     27
7. Skënderbeu              21          6        15        1320-1525     27
8. Elbasani                    21          2        19        1350-1639     22

Faza e “play-off”-it

për titullin “kampion”

Gjysmëfinalet:

Flamurtari – Vllaznia

Goga Basket – Tirana

Shënim: 3 takimet luhen më 10, 13 dhe 17 maj 2016, kjo e fundit nëse do të jetë e nevojshme