ASNN – Java e 14-të e Grupit A të Kategorisë së Parë të Kampionatit Kombëtar të Basketbollit të Femrave nuk pati surpriza këtë javë, pasi pretendentet për titull fituan bindshëm ndaj kundërshtareve të tyre dhe forcuan më tej pozitat e tyre në klasifikim, duke e bërë garën për titull mjaft interesante.
Këtë sezon në basketbollin e femrave paraqiten më mirë dy ekipet e Tiranës, konkretisht Shoqata e Klubit të Basketbollit Femra të Tiranës (SHKBF Tirana e trajnerit Erdal Borova) dhe Shoqata e basketbollit Femra e Tiranës (SHBF Tirana e trajneres Mirza Alibegaj, që mbajnë dy vendet e para në renditje.
Këtyre dy skuadrave u bashkëngjitet Flamurtari, skuadër që ka dominuar basketbollin e femrave vitet e fundit. Skuadra vlonjate mundi të shtunën në Pallatin e Sportit “Qazim Dervishi” në Shkodër Vllazninë, me shifrat e thella 86-49. Ishte një duel i dominuar nga fillimi e deri në fund prej skuadrës së trajnerit Viron Toska.
E cila shfryu në një farë mënyre inatin që ka me dy Tirana, por edhe për humbjen e pësuar në fillim të sezonit në Shkodër, pikërisht përballë Vllaznisë. Sa u takon pjesëve ato nuk kanë nevojë për koment. 10-minutëshi i parë u fitua nga vlonjatet 24-13, kurse në 10-minutëshin e dytë pati një farë rivaliteti që riktheu sadopak emocionin, por pa bërë diferencën, pasi në fund fiton Flamurtari me shifrat 25-13.
Në 10-minutëshin e 3-të janë vlonjatet që thellojnë rezultatin dhe fitojnë 27-11 dhe në 10-minutëshin e 4-t dhe të fundit me shifrat 20-12. Krejt ndeshja përfundon me fitoren e Flamurtarit 86-49, duke bërë që vajzat e skuadrës vlonjate të afrohen në renditje me rivalet e tyre të dy Tiranave.
Kampionati Kombëtar
i Basketbollit – Femra
Java e 14-të:
Të enjten, 28 shkurt 2019:
Studenti – SHBF Tirana 73-104
Të premten, 1 mars 2019:
Elbasani – SHKBF Tirana 78-97
Të shtunën, 2 mars 2019:
Vllaznia – Flamurtari 49-86
Renditja
Nr. Skuadra N. F. H. Pikë
- SHKBF Tirana 14 12 2 26
- SHBF Tirana 14 11 3 25
- Flamurtari 14 10 4 24
- Vllaznia 14 7 7 21
- Studenti 14 2 12 16
- Elbasani 14 0 14 14
