Studenti dhe spektakli i Dorina Memës në lojë. Kështu duhet konsideruar ballafaqimi i djeshëm i skuadrës së Fiorentina Mitkut ndaj Skënderbeut në sallën kryesore të Pallatit të Sportit “Asllan Rusi” në kryeqytet, atje ku nga 85 pikë të shënuara prej ekipit vendës, 44 janë realizuar nga Mema.

Shtatë 3-pikësha, e aftë për të depërtuar deri në zemër të zonës së korçareve, ndërsa arrin jo vetëm të shënojë, por dhe të ngarkojë me personale lojtaret e Skënderbeut, të cilat kanë qenë të pafuqishme për të mbajtur këtë basketbolliste. Shkurt duke shënuar më shumë se gjysmën e pikëve të Studentit, ekipi i Mitkut vazhdon të personifikohet nën emrin e Memës.

Jo se të tjerat nuk kanë mundur të shënojnë, por ajo që është reale dhe që është e dukshme nëse nuk do të jetë kjo lojtare në fushë, atëherë suksesi i Studenti vihet në pikëpyetje. Edhe pse ka bërë përforcime, ndërsa pjesë e skuadrës që nga vera është bërë Vata e Huta, apo në dimër edhe Aliaj, Duqi e Konini, Studenti nuk mund të kuptohet pa Memën.

Një lojtare që del jashtë fushe atëherë kur gjithçka është e garantuar në suksesin për ekipin e Mitkut. Sa për Skënderbeun, edhe pse ka në fushë 3 lojtare të përvojës si Gjika, që bën edhe trajneren, Llazar e Çomollarin, përsëri vazhdon të mbetet “ku thërret kiameti” dhe gjërat janë të dukshme dhe nuk kanë nevojë për shumë koment. Sepse dhe dje ka shënuar 58 pikë atëherë kur ka dashur Studenti për të mos e mundur me një diferencë të thellë më shumë se sa 27 pikë.

Kampionati Kombëtar

i Basketbollit – Femra

Kategoria e Parë

Java e 12-të

(17-18 shkurt 2017)

Të premten:

Studenti – Skënderbeu                  85-58

Goga Basket – Kamza Basket       s’u zhvillua

Të shtunën:

Apolonia – Flamurtari                     ora 11:00

Vllaznia – Elbasani                         ora 12:00

Tirana                                                 pushim

Renditja

Nr.       Skuadra                     N.        F.         H.        Psh-Pp           Pikë

1. Tirana                         10        10          0        714-612         20
2. Goga Basket             10          9          1        876-566         19
3. Flamurtari                  10          8          2        784-631         18
4. Studenti                     10          6          4        669-615         16
5. Vllaznia                     10          5          5        670-645         15
6. Elbasani                    10          3          7        720-756         13
7. Skënderbeu              10          3          7        622-723         13
8. Apolonia                    10          1          9        585-838         11
9. Kamza Basket          10          0        10        504-852         10