Një tjetër humbje e thellë për Kombëtaren e femrave të basketbollit, e cila dje, në kuadrin e Eliminatoreve të Kampionatit Evropian ka arritur një rekord të ri për këtë vit. Është mundur me 86 pikë diferencë nga Britania e Madhe, 122-36, përpara 1,000 shikuesve në Mançester, ndërsa më parë ishin mundur me 83 pikë diferencë nga Italia, 121-38 dhe me 60 pikë diferencë nga Mali i Zi, 99-39.
Një ndeshje që është dominuar totalisht nga Britania e Madhe, që më pas gjithçka e ka kthyer në argëtim. 35-9 ka qenë pjesa e parë për britaniket. 28-15 e dyta dhe në pushim vendëset kanë shkuar me epërsi 53-24. Epërsi që më pas ka ardhur duke u thelluar, kur pjesa e tretë ka përfunduar 32-7 dhe e katërta, 27-7 dhe në total 122-36 për Britaninë e Madhe.
Të mërkurën në “Asllan Rusi” do të jetë Italia, e cila dje ka fituar me vetëm një pikë diferencë ndaj Malit të Zi. Por që për vajzat kuqezi, edhe pse luajmë në fushën tonë, gjërat nuk kanë për të pasur ndonjë ndryshim të madh nga ajo që ka ndodhur në tre Eliminatoret e mëparshme. Sepse në fund të fundit, përtej dëshirës së lojtareve, ky është niveli mediokër që prodhon aktualisht basketbolli i femrave.
Dhe rekordet do të vijojnë të jenë edhe më të mëdha se 86 pikë diferencë dje në Britaninë e Madhe, 36-122. Kombëtarja kthehet sot në Tiranë, ndërsa të hënën e të martën do të bëjë stërvitje në “Asllan Rusi” për të qenë gati për sfidën ndaj Italisë, e cila në Shqipëri vjen ditën e ndeshjes.
Britani e Madhe – Shqipëri 122-36
(35-9, 28-13, 32-7, 27-7)
Britania e Madhe: Vanderval (15), Klark (15), Lid’ham (22), Stjuart (12), Xhons (10) / Hov (10), Kolins (7), Kempbëll (4), Simpson (8), Nejlor (3), Alen (8), Tomson (8). Trajner: H. M. Buseta.
Shqipëria: Zykaj (8), E.Bujari (5), Aliaj (4), Xhanaj (9), Myrto / Përmeti, Lalaj, Gjoni, G. Bujari, Dashja, Llazar (7), Qypi (3). Trajner: E. Borova
Gjyqtarë: R. Rusen Larsen (Danimarkë), B. Van Sloten (Holandë), S. Barrima (Portugali)
