ASNN – Komisioni i Disiplinës pranë Federatës Shqiptare të Basketbollit ka reaguar për dhunën që shpërtheu në ndeshjen e Superligës së Kampionatit Kombëtar të Basketbollit për Meshkuj, midis Vllaznisë dhe Tiranës.
Disiplina i ka pezulluar për 6 muaj dy protagonistët kryesorë të përplasjeve fizike, trajnerin e Vllaznisë, Bledar Gjeçaj, dhe basketbollistin e Tiranës, Erkand Karaj, si dhe i ka gjobitur ata dhe disa lojtarë të tjerë.
Dhuna që shpërtheu në ndeshjen e të premtes, të vlefshme për Superligën e Kampionatit Kombëtar të Basketbollit për Meshkuj, midis Vllaznisë dhe Tiranës, u ka kushtuar shtrenjtë protagonistëve të tij.
Kështu, Komisioni i Disiplinës pranë Federatës Shqiptare të Basketbollit, i ka pezulluar për 6 muaj dy protagonistët kryesorë të përplasjeve fizike, trajnerin e Vllaznisë, Bledar Gjeçaj, dhe basketbollistin e Tiranës, Erkand Karaj, si dhe i ka gjobitur ata me përkatësisht 70,000 dhe 50,000 lekë.
Një pezullim me 3 ndeshje është dhënë edhe për basketbollistin e Vllaznisë, Gjon Ndoja, i cili, së bashku me shokun e tij të skuadrës, Dod Lekndreajn, por edhe me dy basketbollistët e Tiranës,Gerti Shima dhe Manuel Xhonson, janë gjobitur me nga 30,000 lekë secili.
Një gjobë prej 10,000 lekësh është vendosur edhe ndaj klubit të Vllaznisë, për mungesën e masave të nevojshme për të garantuar ecurinë dhe sigurinë e ndeshjes. Klubi i Tiranës ka bërë të ditur se do ta apelojë këtë vendim, ndërsa ende nuk ka asnjë reagim zyrtar nga Vllaznia.
