ASNN – Eliminatoret e Kampionatit Botëror të Basketbollit të Meshkujve “Kinë 2019”, teksa bëhet fjalë për turin e parë eliminator, kanë qenë përsëri për ndërkombëtarin shqiptar Gentian Cici, i cili dje ka firmosur ndeshjen e tij të 11-të për sezonin 2017-2018, ka qenë gjyqtar i dytë në superndeshjen e grupit A, Spanjë-Slloveni 92-84 (20-21, 24-17, 29-17, 15-19). Në këtë ndeshje, e cila është luajtur në Burgos në “Pabelon Multiusos Kolesium Burgos”, gjyqtar i parë ishte italiani Manuel Maxoni, kurse i tretë lituanezi Tomas Jasevicius.
Nëntë ndeshje në Ligën e Kampioneve, dy në turin e parë të eliminatoreve të Kampionatit Botëror “Kinë 2019”, ku ka gjykuar një herë Bosnje-Hercegovinë, Rusinë, Spanjën dhe Rusinë, pa harruar që në turin paraeliminator ka qenë tek Bosnjë-Hercegovinë-Armeni, ndërsa kështu Cici i ka kaluar të gjitha limitet dhe mbetet gjithnjë në vëmendje të ndërkombëtareve për ndeshjet e rëndësishme. Ndërkohë po në turin e parë të Eliminatoreve të Kampionatit Botëror ka qenë edhe vëzhguesi shqiptar Stavri Bello.
Bello, që ka shkuar në 6 ndeshje ndërkombëtare për sezonin 2017-2018 (dy në Euroligë për femra, dy në “EuroCup” për femra, një në “FIBA Europe Cup” për meshkuj dhe tani në Eliminatoret e Botërorit), ishte në ndeshjen e grupit D, Rumani-Holandë, 75-68 (16-15, 18-12, 20-19, 21-22). Ai ka vëzhguar turkun Zafer Jilmaz, serben Jasmina Juras dhe maqedonasin Aleksandar Milojeviç. Përfundimisht si Cici, ashtu dhe Bello, duke qenë gjithnjë në qendër të vëmendjes së ndërkombëtarëve mbeten pa një e pa dy, ndër figurat më të mira të basketbollit shqiptar.
Sepse vërshëllima e Cicit dhe prania në tavolinë si komisar i Bellos janë gjëja më e vlefshme në këtë basketboll të lënguar shqiptar. Ndërkohë rregullorja e eliminatoreve është që nga turi i parë kualifikohen 3 të parët e çdo grupit, të cilët do të formojnë 4 grupe me nga 6 skuadra, atje ku përsëri 3 të parët kualifikohen për në fazën finale të Botërorit “Kinë 2019”.
