ASNN – Anulohen Evropianët e basketbollit të kësaj vere, edhe ai i të rinjve, i parashikuar të mbahej në Kosovë. Të gjitha kampionatet evropiane të basketbollit, të parapara të mbaheshin këtë verë, janë anuluar nga FIBA Evropë, si pasojë e koronavirusit. Kështu, lëtë verë ishin parashikuar të mbaheshin 16 kampionate evropiane të FIBA-s, midis tyre edhe ai i Nën-16-vjeçarëve për meshkuj, Divizioni C në Prishtinë. Evropiani në kryeqytetin e Kosovës ishte parashikuar të mbahej nga data 11, deri më 19 korrik 2020.
Por shtetet që ishin parashikuar t’i mirëprisnin këto Kampionate Evropianë të moshave, do ta kenë mundësinë ta bëjnë këtë vitin e ardhshme. “Ka qenë një vendim i pritur, pavarësisht se është zhgënjyes”, – ka thënë Sekretarja e Përgjithshme e Federatës së Basketbollit të Kosovës, Elvira Dushku. – Megjithatë shëndeti e mirëqenia e lojtarëve, trajnerëve, zyrtarëve e tifozëve është gjithnjë përparësi. Ndërkaq sa i përket përfaqësueseve të moshave të Kosovës, të cilat kishim planifikuar t’i dërgonim këtë verë në Evropianet e FIBA-s, shpresoj se do të mund të bëjmë diçka për to gjatë këtij viti”, – ka vijuar ajo.
“Do ta analizojmë këtë situatë të re të krijuar së bashku me Bordin e FBK-së, Drejtorinë e Përfaqësueseve të Kosovës dhe Këshillin Profesional e më pas do të shohim se çfarë do të mund të bëjmë, – ka sqaruar Dushku. – Krahas pjesëmarrjes në Kampionate Evropiane të FIBA-s, Federata e Basketbollit të Kosovës ishte caktuar të organizonte Kampionatin Evropian në Nën-16-vjeçarëve të FIBA-s, Divizioni C, në Prishtinë, nga data 11, deri më 19 korrik 2020. Ne tashmë i kemi kryer të gjitha punët teknike në koordinim me zyrtarët e FIBA Evropës.
“Sidoqoftë tani na mbetet që në bashkëpunim me Bordin e FBK-së dhe FIBA Evropën dhe institucionet e vendit tonë të punojmë në atë drejtim që të vazhdojmë me përgatitjet për vitin e ardhshëm”, – ka përfunduar Sekretarja e Përgjithshme e Federatës së Basketbollit të Kosovës, Elvira Dushku. Sa i përket Kampionatit Evropian për të rritur, i parashikuar të mbahet vitin e ardhshëm, Komiteti Ekzekutiv i FIBA-s do të diskutojë të enjten, duke marrë parasysh se Lojërat Olimpike në Tokio janë shtyrë për vitin e ardhshëm dhe kjo do të ketë ndikim në kalendarin sportiv.
Pas bisedimit të Komitetit Ekzekutiv të FIBA-s, FIBA Europe do të bisedojë me vendet organizatore dhe të marrë vendim. Po ashtu është marrë vendim edhe për veprimtaritë e klubeve të FIBA-s, që janë pezulluar. Tri veprimtaritë e pezulluara janë “EuroLiga” e femrave, “EuroKupa” e femrave dhe “FIBA Europe Cup”. Bordi ka pranuar që mundësia më e mirë për të mbyllur këto gara është një turne përfundimtar i sezonit në shtator apo tetor, në disa formate: Një “4-she finale” të “FIBA Europe Cup”, një “8-she Finale” të “EuroLigës” së femrave dhe një “8-she Finale” te “EuroKupës” tek femrat. Secili turne të organizohet në një destinacion.
