ASNN – Goga Basket është një prej skuadrave më të mira të këtij edicioni në basketbollin e meshkujve dhe me pritshmëri të mira për të fituar titullin, megjithëse rivaliteti për kreun këtë edicion është mjaft i fortë dhe i spikatur. Skuadra private e Durrësit ndodhet në vend të parë me 18 pikë, një pikë më shumë se dy ndjekësit e saj dhe rivalët për titull, Teuta dhe Partizani.
Kjo ecuri e mirë e skuadrës jep shpresë për sukses dhe këtë e ka pranuar edhe drejtori sportiv i akademisë së klubit, Marsel Aliaj. Në një intervistë për mediat sportive shqiptare, Aliaj vë theksin edhe tek një problem që duhet zgjidhur e që ka të bëjë me një stacion autobusi që duhet shtuar nga Xhafzotaj tek Akademia e Basketbollit “Goga Basket, në mënyrë që t’u jepet mundësia të interesuarve dhe sportdashësve që të afrohen me pallatin e sportit nëpërmjet transportit publik.
“Për ne çdo gjë shkon mirë, – u shpreh ndër të tjera drejtori sportiv i “Goga Basketit”, Marsel Aliaj, – numri i fëmijëve që aderojnë në këtë sport sa vjen e rritet. Ndikimi shoqëror është i ndjeshëm dhe është një investim shumë i shëndetshëm. Ne jemi në rrugën e duhur dhe punën tonë po e bëjmë me shumë pasion dhe përkushtim. Por duam që edhe faktorët e jashtëm të na ndihmojnë dhe këtu e kam fjalën për ligjin e sportit.”
“Nga ana tjetër, kërkojmë nga institucionet përgjegjëse ta kthejnë kokën nga ne. Impakti që ka sjellë akademia jonë është i jashtëzakonshëm, ndaj kërkojmë mbështetje sa i përket transportit. Aktualisht, transporti publik vjen deri në Xhafzotaj dhe ne jemi vetëm 1.5 km larg që aty. Nëse do të mundësohej kalimi deri tek ne, pra vetëm një stacion më shumë, interesi do të ishte i gjithanshëm”, – shtoi më tej drejtori sportiv i akademisë së klubit Goga Basket, Marsel Aliaj.
