ASNN – Barcelona fitoi një Ligë Kampionesh “të përsosur”, pasi mundi kampionet e Anglisë, Francës, Gjermanisë dhe Italisë. Nuk është e para skuadër që fiton Ligën e Kampioneve, por suksesi i saj duket i përsosur.
Barcelona u ngjit në krye të kontinentit pasi kaloi në të gjitha turet vetëm skuadra kampione, madje të ligave kryesore evropiane. Në turin e 16-shes eliminoi kampionen e Anglisë, Mançester Sitin, duke e mundur në të dyja ndeshjet.
Suarez dhe Rakitiç ishin shënuesit, por spektaklin e dha Mesi. Triumf i plotë edhe ndaj kampiones së Francës, Paris SG-së. Çerekfinalja u kalua shumë më lehtë sesa mendohej, me treshen e sulmit që krijoi dhe realizoi golat.
Autorë, në dy fitoret 3-1 e 2-0, ishin dy herë Suarezi dhe tri herë Nejmari. Më e vështirë pengesa e fundit para finales, Bajerni i Mynihut. Kampionia e Gjermanisë rezistoi gjatë, por magjia e Mesit e mundi në “Kamp Nou”.
Argjentinasi dhe Nejmari realizuan golat në Barcelonë dhe në “Allianz Arena”. Bavarezët e Guardiolës, të paktën mbrojtën nderin duke i shkaktuar katalanëve një humbje të rrallë.
Kampionia e fundit u mund në finale, ajo e Italisë, Juventusi. Suksesi bëhet vërtet i përsosur kur shikon se edhe në fazën e grupeve, Barcelona kaloi ekipe kampionë, të tillë si Paris SG-ja, Ajaksi dhe APOEL-i Nikozisë.
