ASNN – Atletja shqiptare Luiza Gega sjell vendin e parë dhe kreun e podiumit, të parin për Shqipërinë nga Lojërat Olimpike Evropiane që po zhvillohen në Baku. Ajo është shpallur fituese në garën e 1,500 metrave, teksa ka vendosur edhe një rekord olimpik evropian për kohën e dhënë.

Kështu, Luiza Gega ka shkëlqyer në Lojërat e Para Olimpike Evropiane, të cilat po zhvillohen në kryeqytetin azer. Atletja shqiptare ka marrë vendin e parë në garën e 1,500 metrave duke vendosur edhe një rekord olimpik evropian, me kohën e 4 minuta, 11 sekonda dhe 58 të qindat.

Midis 14 konkurrenteve, Gega ka mbërritur e para në finish duke shkruar emrin e saj me të arta në garën e saj të preferuar, pikërisht në 1,500 metra, duke u kurorëzuar rekordmene e Lojërave Evropiane. Ky vend i parë për Luizën vjen vetëm 24 orë pas atij të dytë, që mori kampionia shqiptare pas konkurrimit në garën e 800 metrave.

Një sukses i jashtëzakonshëm ky për atleten tonë, e cila sjell vendin e parë në një garë për Shqipërinë pas një gare të shkëlqyer. Gega hyn në historinë e Lojërave edhe si rekordmenia e garës së 1500 metrave. Falë këtij triumfi 26-vjeçarja i ka dhënë delegacionit shqiptar 14 pikë në renditjen e përgjithshme ekipore.

Përveç dy sukseseve të atletes Luiza Gega, sukses ka arritur Izmir Smajli në garën e kërcimit së gjati teksa ka marrë vendin e dytë.Dy garuesit shqiptarë shkëlqyen në disiplinat e ndryshme të mbretëreshës së sporteve, atletikës duke koleksionuar dy vende të dyta çka përkthehen praktikisht në dy medalje argjendi.

Por duhet sqaruar se në atletikë, në këtë Olimpiadë, nuk ka medalje individuale, pasi është një garë ekipore.