ASNN – Zyrtarisht, “Tokio 2020” do të kushtonin rreth një biliardëjenë japonezë (9 miliardë dollarë amerikanë), çka në vetvete është rreth 7 herë më shumë se përllogaritja paraprake. Megjithatë, ka zëra se edicioni i 32-të i festivalit më të madh sportiv në planet do të kushtojë thuajse 3 herë më tepër se kaq, duke e çuar shifrën në afro 25 miliardë dollarë.

Edhe pse mund të duket shumë, Olimpiada japoneze do të kushtojë më pak se ajo e verës në Kinë, “Pekin 2008”, që kapi shifrën 45 miliardë dollarë, e akoma më pas sesa ajo e dimrit në Rusi, “Soçi 2014”, që kapi shifrën 51 miliardë dollarë. Por Presidenti i Komitetit Olimpik Ndërkombëtar (IOC), Tomas Bah, ka thënë se vetë shtyrja e Lojërave Olimpike “Tokio 2020” për një vit, për shkak të epidemisë së “COVID-19”, ka kosto të lartë.

Me datën e re, Lojërat Olimpike të Tokios do të nisin më 23 korrik dhe do të përfundojnë më 8 gusht të vitit të ardhshëm. Nga Komiteti Organizativ i këtyre Lojërave Olimpike në Tokio është paralajmëruar se nuk do të ketë shtyrje tjetër, duke lënë të nënkuptohet se po nuk u zhvilluan në 2021-shin, nuk do të zhvillohen fare. Por tanimë, sipas mediave japoneze, drejtuesit e këtij Komitetit Organizativ të Olimpiadës, thonë se kostoja e shtyrjes do të jetë diku midis dy dhe 6 miliardë dollarëve.

“Ndonëse është herët për të përcaktuar një shifër të saktë për këtë shtyrje, ne e dimë se duhet të mbulojmë një kosto prej disa qindra milionë dollarë”, – ka shkruar ndër të tjera presidenti Bah në një letër të hapur të publikuar në faqen zyrtare të Komitetit Olimpik Ndërkombëtar (IOC). “Momentalisht, asnjëri nuk di se si do të duket realiteti i botës pas koronavirusit, – ka shtuar ai. – Ne duhet të shikojmë disa nga aktivitetet tona dhe të bëjmë përshtatjet me realitetin e ri.”