AlbanianSport.com 16/10/2018 15:15
ASNN – Milani po habit gjithmonë e më shumë në objektivat e tij në merkato. Edhe pse merkato më e afërt, ajo e dimrit, do dhe dy muaj e gjysmë të vijë, milanistët po shohin mundësinë të rikthejnë disa figura të shquara në skuadër, midis të cilëve sulmuesit Ibrahimoviç dhe Pato. Për këtë të fundit ka pasur mjaft dyshime mos ishte ndonjë “kurth” i mediave italiane, por ka qenë vetë futbollisti që nga Kina ka rrëfyer të gjithë historinë e kontaktit.
“Kam marrë disa oferta nga skuadra në Serinë A dhe në Evropë, të shohim se çfarë do të ndodhë në fund të këtij viti, – ka deklaruar braziliani. – A do të kthehem tek Milani? Me Leonardon kemi shkëmbyer disa batuta dhe ai ka treguar gjithmonë vlerësim karshi meje. Unë kam edhe një vit kontratë në Kinë, të shohim se çfarë do të ndodhë. Gatuzo është gjithmonë i fokusuar, e njeh mjaft mirë mjedisin e Milanit. Ai është emri i duhur për të mbajtur grupin të bashkuar.”
Më pas sulmuesi brazilian, i cili ka qenë për një kohë të gjatë i lidhur edhe me vajzën e Berluskonit, foli rreth mundësisë së kalimit të talentit brazilian Paketa në radhët e Milanit. “Është me të vërtetë i aftë, këshilla ime është që të mësojë menjëherë gjuhën italiane që të përshtatet shpejt dhe të mundohet në çdo mënyrë të bëjë mirë në fushën e lojës, – tha 29-vjeçari. – Tifozët e Milanit janë të jashtëzakonshëm dhe do ta duan shumë.”
“Edhe Ibrahimoviç do të ishte e bukur nëse do të kthehej”, – shtoi më tej Pato. Bisedat telefonike të Leonardos me Paton dhe sinjalet pozitive që po lëshon Gatuzo për përtëritjen e “pleqve” tek Milani, të bindin që këto projekte nuk janë thashetheme, as fantazira, por lëvizje reale për t’i dhënë Milanit pak besim në vetvete dhe për të kthyer metodat që të sjellin fitime me shitje të fanellave, të drejtën televizive, imazhin, reklamimin etj.