Vrapimi në Mal i ka shpallur kampionët e saj për vitin 2016 nën rrebeshin e shiut që kishte pushtuar Tiranën që nga mesnata e së dielës. Edhe pse kështu, ndërsa njerëzve u janë dashur jo vetëm të marrin çadrat, por dhe të gjejnë se ku i kishin futur veshjet me mëngë të gjata, Federata Shqiptare e Atletikës (FSHA) nuk e ka ndërprerë këtë garë të fundit kombëtare.
“Sepse, – ka thënë Sekretari i Përgjithshëm i FSHA-së, Nikolin Dionisi, – njerëzit kanë ardhur, ndërsa kishin kohë që ishin lajmëruar për një veprimtari të tillë”. Nuk duhet harruar që kjo veprimtari ka qenë i parashikuar për t’u zhvilluar më 30 maj 2016, por u anullua për shkak të Asamblesë Parlamentare të NATOS, të zhvilluar në Tiranë gjatë atyre ditëve.
Në fakt vështirësia më e madhe ka qenë për gjyqtarët, sidomos ata që kanë qenë për të ruajtur atletët gjatë vrapimit për të mos devijuar nga korsia, apo e thënë ndryshe për të mos gjetur shtegun e shkurtër e për të dalë menjëherë pranë finishit. Edhe sepse gjëra të tilla kanë ndodhur në veprimtaritë e këtij lloji në atletikë, së fundmi në Krosin Kombëtar të 15 shkurtit 2016.
Madje sekretarja e garave, Vjollca Hazizllari, ka shfrytëzuar një nga lokalet e Kodrave të Liqenit për të ndenjur brenda e për të plotësuar protokollet e diplomat në mënyrë që të mos lagej asgjë. E si për humor vetë Hazizllari ka kujtuar: “Eh sa herë kishim gara, aq herë binte shi, kështu që nuk është gjë e jashtëzakonshme!”. E, si për inat, pasi ka përfunduar Kampionati i 7-të Kombëtar i Vrapimit në Mal, shiu ka pushuar.
Dhe Tirana ka vijuar me një kohë me diell deri diku jo shumë të fortë. Kësisoj kampionët e Vrapimit në Mal janë shpallur nën reshjet e shiut, atje ku nuk mbeti askush pa u lagur.
