ASNN – Atletika shqiptare shënoi një sukses të rëndësishëm në Kampionatin Ballkanik të Stambollit, por edhe në Kupën Ndërkombëtare të Stambollit, të mbajtur pak ditë më parë në Turqi. Atletët Izmir Smajlaj, Franko Burraj dhe padyshim atletja Luiza Gega, i sollën medalje Shqipërisë (1 ari, 1 argjendi dhe 2 bronzi) dhe e nisën mbarë e mirë vitin 2019.
Tashmë është marrë edhe vendimi dhe atleti Izmir Smajlaj e atletja Luiza Gega do të përfaqësojnë Shqipërinë në Kampionatin Evropian, që do të mbahet nga data 1, deri më 3 mars 2019 në Gllasgou të Skocisë. Është një moment delikat por edhe shpresëdhënës për atletikën shqiptare, sepse të dy sportistët gëzojnë formë të mirë dhe kanë pretendime.
Por rivaliteti është shumë i madh dhe vështirësia për të hyrë në zonën e medaljeve është evidente. Shkodrani Smajlaj do të garojë si përherë në kërcimin së gjati, gara e tij e preferuar dhe njëherësh ku ka mundësi maksimale për rezultat. Pretendimet e tij janë të kalojë 8 metrat me patjetër, sepse vetëm kështu mund t’ia dalë. Megjithëse gjatë këtij viti ende nuk e ka kapërcyer këtë kufi.
Ndërkohë, atletja Luiza Gega do të garojë në 3000 metra, por nuk përjashtohet mundësia që të garojë dhe në 1500 metra. Shtatvogla e atletikës shqiptare, një xhevahir i garave të mesme të shpejtësisë, ka synime për një medalje në 3000 metra, gjë që do ta radhiste atë ndër atletet më të mira evropiane të kësaj gare. Vlen të theksohet fakti se, përkundër asaj që pritej, Eraldo Qerama ka mbetur jashtë Evropianit.
Një gjë e tillë ishte e papritur, sepse në fakt rekordmeni kombëtar i garës së 800 metrave, që pak javë më parë theu rekordin që e mbante vetë që më 2013-ën, ishte i vetmi, së bashku me Luiza Gegën, që e kishte arritur normën e kualifikimit për në “Gllasgou 2019” në këtë disiplinë. 1 minutë, 48 sekonda e 95 të qindtat është koha e rekordit të Qeramës, ndërsa norma e kualifikimit për në Evropian është 1 minutë, 48 sekonda e 95 të qindtat.
