3 korrik 2014, Luiza Gega, pjesëtare e Policisë Ushtarake, do të ngjitej në tribunë e do të premtonte mbajtjen dhe ngritjen sa më lart të flamurit të Shqipërisë në arenën Botërore dhe Evropiane. E pas dy vjetësh, më 10 korrik 2016, e vogla e artë e atletikës shqiptare do të ishte nënkampione e Evropës në Amsterdam në 3000 metra me pengesa. Dhe tashmë, edhe duke qenë flamurmbajtësja e Shqipërisë në Lojërat Olimpike “Rio de Zhaneiro 2016”, por jo vetëm kaq, e vetmia shpresë e vendit tonë për një medalje olimpike, Luiza Gega vijon stërvitjen intensive në Dardhë dhe në Korçë.
E sigurisht, edhe pse është e diel, teksa të tjerët janë duke u kredhur pranë bregdetit, apo dhe liqenit, e pse jo dhe në vende malore, Luiza Gega nuk ka pushim. Stërvitje, stërvitje, me qëllimin final sjelljen e medaljes së parë olimpike në Shqipëri. Por për të ka dhe surpriza… Nënkampionia e Evropës në 3000 metra me pengesa, Luiza Gega, ka marrë një surprizë nga kolegët e saj të Policisë Ushtarake dhe ministrja e Mbrojtjes, Mimi Kodheli. Kjo e fundit, si dhe efektivët e Policisë Ushtarake kanë vizituar atleten në fshatin turistik të Dardhës, atje ku po stërvitet në prag të Lojërave Olimpike “Rio 2016”.
Me rastin e shpalljes nënkampione e Evropës në 3000 metra me pengesa, pjesëtarja e Forcave të Armatosura, është nderuar nga ministrja Kodheli me Medaljen e Mirënjohjes për kontributin dhe vlerat e veçanta në shërbim të lartësimit të figurës së ushtarakut të Forcave të Armatosura, brenda dhe jashtë vendit. Ministrja Kodheli, e shoqëruar nga deputeti i Kuvendit të Shqipërisë, Ilir Pendavinji, përgëzoi atleten për rezultatin e shkëlqyer që arriti në Kampionatin Evropian, si dhe i uroi asaj suksese në Lojërat Olimpike “Rio 2016”.
