Federata Shqiptare e Atletikës nuk i ka përfunduar të gjitha veprimtaritë e saj kombëtare për vitin 2016. Sepse ka mbetur për t’u zhvilluar Kampionati i 7-të Kombëtar i Vrapimit në Mal, që në fakt duhet të ishte bërë më 30 maj 2016.

Por për shkak të Asamblesë Parlamentare të NATO-s, ndërsa i gjithë sheshi “Nënë Tereza” dhe të gjitha rrugët përreth Pallatit të Kongreseve ishin të bllokuara për arsye sigurie, ky kampionat u shty.

Dhe dje sekretari i përgjithshëm i Federatës Shqiptare të Atletikës, Nikolin Dionisi, ka lajmëruar se gjithçka do të zhvillohet të hënën, ndërsa i ka kërkuar klubeve që të dërgojnë sa më shpejt listën e federimit të atletëve pjesëmarrës në mënyrë që sportistët të jenë licencuar.

Garat janë njësoi si të krosit kombëtar, por tashmë atletika shqiptare është gati për kampionatin e 7-të kombëtar të Vrapimit në Mal.

Kampionati i 7-të Kombëtar

i Vrapimit në Mal – Atletikë

Programi i garave:

Ora 10:00                   4 kilometra (Të reja)

Ora 10:40                   8 kilometra (Të rinj)

Ora 10:40                   8 kilometra (Të rritura)

Ora 11:30                   12 kilometra (Të rritur)