ASNN – Rindërtimi i Stadiumeve të futbollit në Shqipëri, duhet që, http://albaniansport.com/new/wp-content/uploads/2016/02/Sebastiani-Koe-interviste-ABK-tjeter.jpgbrenda mundësive, të krijojë mjedise edhe për atletikën. Ky është apeli që Presidenti i Federatës Botërore të Atletikës, Lordi Sebastian Koe, ka bërë gjatë vizitës së tij në Tiranë. Duke folur për Televizionin Shqiptar, kreu i atletikës botërore ka theksuar se atletikës shqiptare duhet t’i ofrohet një alternativë, për të patur mjediset e saj.
Presidenti i Federatës Botërore të Atletikës, Lordi Sebastian Koe, ka mbërritur të hënën në Tiranë për një vizitë në Tiranë dhe, duke folur në pistën e Stadiumit Kombëtar “Qemal Stafa”, që do të prishet për t’i lënë vendin një stadiumi të ri, ai ka shprehur shqetësimin e tij për humbjen e një tjetër mjedisi sportiv për atletikën.
“Gjithmonë shqetësohem kur humbasim një pistë atletike dhe gjithmonë kam këmbëngulur, jo vetë në Evropë, por në çdo pjesë të botës, që t’i ruajmë këto pista, sepse nëse e humbasim këtë infrastrukturë, shpesh humbasim bazën e këtij sporti, humbasim sportistët, trajnerët dhe mbështetësit e atletikës”, – ka thënë ai.
“Dhe kur them që është e rëndësishme të ruajmë një pistë, nuk e kam fjalën vetëm për garën, por edhe për stërvitje”, – ka vijuar britaniku. Duke bërë një apel për autoritetet shqiptare dhe Federatën Shqiptare të Futbollit, Koe ka këmbëngulur se mund të gjendet një rrugëdalje e pranueshme nga të gjithë.
“Unë besoj se është e mundur se futbolli dhe atletika mund të bashkëjetojnë në një stadium, – ka thënë kreu i IAAF-it. – Megjithatë, edhe nëse është marrë një vendim që një stadium të jetë vetëm për futbollin, siç mund të jetë rasti i këtij stadiumi, atëherë atletikës shqiptare duhet t’i ofrohet një alternativë, për të patur mjediset e saj.
“Kjo sepse një pistë atletike nuk është domosdoshmërisht vetëm për sportistët, por edhe për njerëzit që dëshirojnë të merren me sport”, – ka shtuar Presidenti i Federatës Botërore të Atletikës, Lordi Sebastian Koe. Duke folur për Televizionin Shqiptar, kreu i atletikës botërore ka theksuar se sfida e tij është rikthimi i besimit tek ky organizëm i goditur nga skandalet me dopingun.
