ASNN – Këto janë 11 faktet që nuk i keni ditur nga fëmijëria e Jusein Bolt, nga jeta e shfrenuar e natës tek briketi. Jusein Bolt është sprintieri më i madh i të gjitha kohërave, me 9 medalje ari në 3 Olimpiada të ndryshme (Pekin 2008, Londër 2012 dhe Rio 2016). Rekordet e tij në garat e shpejtësisë në 100 dhe 200 metra janë përtej imagjinatës dhe do të duhet të dalë në skenë ndonjë “jashtëtokësor” tjetër që t’i thyejë.
Shumë njerëz dinë gjithçka rreth jetës së këtij atleti, si pasojë e madhështisë së tij në sport, por shumë pak vetë e dinë që fëmijëria e gjigandit të atletikës botërore ka qenë mjaft aktive jo vetëm në sport, por edhe në jetën e natës apo në sportet e tjera jashtë atletikës si kriket apo basketboll.
- Jusein Bolt u lind më 21 gusht të vitit 1986, në Shervud Kontent, një qytezë e vogël në Trelauni të Xhamajkës. Kur ishte mjaft i ri ai shfaqi interes në disa sporte dhe kaloi disa kohë duke luajtur futboll, kriket dhe basketboll.
- Për një farë kohe, i pyetur nga të tjerët se çfarë sportisti ishte, ai u përgjigjej se kishte zgjedhur të ishte “kriketer” (lojtar i kriketit). Por talenti i tij si sprintier do të dilte shpejt në pah dhe ai shkëlqeu thuajse në të gjitha garat ku mori pjesë deri në moshën 14-vjeçare.
- Ishin pikërisht garat e luajtura në këtë moshë që e formuan atë si sprintier dhe këshillat që i erdhën nga të gjithë, përfshi dhe shumë specialistë të atletikës në vendin e tij, ishin që ai të mos i ndahej garave të shpejtësisë.
- Për herë të parë në këtë moshë (15 vjeç) ai mësoi dhe u bind se një sprintier i madh nuk do të thotë të ishte medoemos i shkurtër dhe i fuqishëm, sikurse ishim mësuar të shihnim deri atëherë, përkundrazi, sipas tij një i gjatë mund të bëhej sprintier edhe më i madh.
- Në moshën 16-vjeçare, në vitin 2002, ai fitoi medaljen e artë në Kampionatin Botëror të të Rinjve në garën e 200 metrave. Deri në këtë moment, ai dha tek spektatorët, ndjekësit dhe specialistët idenë e një atleti të qetë, por jo ende në atë lartësi që do të shfaqte më vonë me të gjithë madhështinë e tij.
- Pikërisht atëherë, ai nuk pati një jetë të disiplinuar por shijonte vallëzimin dhe jetën e natës në Kingston të Xhamajkës. Megjithatë, ishte gatuar për të qenë shumë i shpejtë dhe ia doli të fitojë sërish këtë garë një vit më vonë në Kampionatin Botëror të të rinjve në vitin 2003.
- Në vitin 2004, Bolt u kthye në atlet profesionist, nën drejtimin e trajnerit të ri Fitz Koleman. Ai filloi karrierën e tij me pjesëmarrjen në Lojërat e “CARIFTA” në Bermuda.
- Jusein Bolt u bë i pari sprintier i kategorisë së të rinjve që theu rekordin e 200 metrave dhe e uli kohën e kësaj gare nën 20 sekonda (19’’93).
- Deri në vitin 2005, Jusein Bolt ishte këshilluar me një trajner të ri, Glen Mills, i cili e orientoi atë drejt një dimensioni tjetër të atletikës. Ai i kërkoi atletit xhamajkan të jetë më profesionist në sjelljen e tij dhe të lerë pas jetën e natës dhe kohën e shpenzuar kot dhe të shfrytëzonte më mirë talentin e tij natyror të papërsëritshëm.
- Për shumë muaj me radhë, madje vite, Jusein Bolt kaloi disa dëmtime që nuk e lanë të shfaqej në kulmin e tij, por ai sërish ruajti një profil të lartë në garat ku mori pjesë, duke qenë gjithmonë në rangun e pretendentëve.
- Kuptohet, pas lëndimesh të gjata dhe pasi kishte lënë pas fëmijërinë dhe adoleshencën, Jusain Boltit iu dha mundësia të tregonte kapacitetin e tij fenomenal në atletikë në vitin 2007, një vit para se ai të hinte në histori në Olimpiadën e Pekinit. Në Botërorin e vitit 2007, ai fitoi medalje argjendi në 200 metra dhe në stafetën 4x100metra.
Në garën e 100 metrave, ai regjistroi po atë vit një rekord botëror me 9.72 sekonda në “Grand Prix” të Nju Jorkut, duke thyer rekordin e Asafa Pauellit. Prej atij momenti e për një dekadë me radhë, Jusein Bolt ka shkruar historinë e garave të 100 dhe 200 metrave, duke qenë unikal në historinë e atletikës. Garat që ai ka bërë dhe rezultatet që ka shënuar, studiohen nga shkencëtarët e fizikës, dinamikës etj, por veçanërisht specialistët e atletikës, pasi Jusein Bolt është “mbreti” i sprintit.
