ASNN – Në përfundim të Kampionatit Dimëror Individual, Sekretari i Përgjithshëm i Federatës Shqiptare të Atletikës, Nikolin Dionisi për të përditshmen sportive shqiptare, “Sport Ekspres”, do të deklaronte: “Këto janë garat individuale dimërore dhe në përfundim të këtij aktiviteti Federata, në bashkëpunim me Komitetin Drejtues, do të bëjë përzgjedhjen e atyre që do të marrin pjesë në Stamboll. Është kënaqësi të zhvillosh gara në këtë stadium dhe falënderoj qeverinë shqiptare për këtë pistë që ka ndërtuar”.
Dhe e vërteta është se pas përfundimit të garave dimërore është mbledhur dhe Komisioni Teknik, i cili ka bërë propozimet e veta për kombëtaren e atletikës, që do të marrë pjesë në Ballkaniadën e Stambollit. “Por, – thotë Dionisi, – edhe për shkak se mungonin disa anëtarë të Komitetit Drejtues vendimi do të merret sot. Sigurisht që do të jenë vendet e para, ndërsa me kërkesë të trajnerit Taulant Stërmasi do të jetë edhe Eraldo Qerama, i cili është duke u stërvitur në Kenia.”
“Do të ishte nder për ne që të merrte pjesë edhe Jorgo Mino, edhe ky stërvitet në Kenia, por nga Stërmasi kemi vetëm kërkesë për Qeramën, – ka vijuar nr. 2 i organizmit që qeveris atletikës shqiptare. – Problemi është se nga 9.500.000 lekë, “grant”-i për këtë vit na është shkurtuar në 9.000.000 lekë. Kështu që në pjesëmarrjen në Ballkaniadën e Stambollit do të jemi në të njëjtin numër si vitin e kaluar.” Në përfundim, atletika i ka shpallur kampionët e parë të vitit, ndërsa Smajlaj, Muço dhe Dauti ishin më të mirët e garave.
