ASNN – Kampionati Kombëtar Individual Dimëror i Atletikës (që në fakt duhet të ishte Kampionati Kombëtar i Sallave të Mbyllura, por që nuk ekzistojnë në Shqipëri) u zhvillua të mërkurën në Elbasan, me një pjesëmarrje të konsiderueshme të atletëve në shumë disiplina, ku u përcaktuan fituesit por njëherësh u shpallën dhe më të mirët që do të garojnë në veprimtaritë e ardhshme ndërkombëtare, pra do të përfaqësojnë ngjyrat kuqezi.
Natyrisht që pritej, Franko Burraj i Vllaznisë u shpall sportisti më i mirë i veprimtarisë, pasi ai garoi në 400 metra dhe grumbulloi 1,023 pikë. Kurse sportistja më e mirë femër e këtij kampionati u shpall Elisa Myrtollari e Skënderbeut, me 914 pikë në garën e 60 metrave. Kjo veprimtari pati një pjesëmarrje të konsiderueshme, me përbërjen e 10 ekipeve, me 175 sportistë në total nga Shqipëria dhe Kosova, nga të cilët 105 meshkuj dhe 70 femra.
Kuptohet, tek meshkujt dominuan sportistët e Vllaznisë, kurse tek femrat ato të Tiranës. Në përfundim të Kampionatit Kombëtar Individual Dimëror të Atletikës, Sekretari i Përgjithshëm i Federatës Shqiptare të Atletikës, Nikolin Dionisi, e çmoi me nota pozitive këtë veprimtari dhe, sipas tij, rezultatet janë përcaktuese për pjesëmarrjen në turneun e Stambollit. “Pas kësaj veprimtari do të mblidhet Komiteti Drejtues i Federatës dhe do të vendosë se cilët sportistë do të marrin pjesë në garat e Stambollit”, – sqaroi ai.
“Shpresojmë që në garat e Kampionatit Botëror në Doha, veprimtaria më e rëndësishme e atletikës për këtë vit, të shkojmë me tre sportistë, Luiza Gegën, Izmir Smajlajn dhe Franko Burrajn, – tha nr. 2 i organizmit që qeveris “mbretëreshën” shqiptare të sporteve, atletikën. – Siç e dini, ky i fundit, në turneun e zhvilluar në Marsejë të Francës, theu dhe rekordin kombëtar 22-vjeçar të garës së 400 metrave në sallat e mbyllura.”
Kampionati Kombëtar Individual
Dimëror i Atletikës 2019
Fituesit e disiplinave
Meshkuj
Atleti / Klubi Gara Rezultati
Adriatik Hoxha / Teuta Gjyle 14.89 m
Edison Cardaku / Vllaznia 60 m 7’’10
Ravio Rama / Vllaznia 60 m/p 8’’68
Muhamet Cengeli / Vllaznia 3-hapësh 14.54 m
Gledis Halluni / Vllaznia Së gjati 7.41 m
Milen Caco / Skënderbeu Së larti 1.7 m
Franko Burraj / Vllaznia 400 m 48’’30
Marko Makaj / Tirana 800 m 1’57’’92
Marko Makaj / Tirana 1,500 m 4’15’’69
Elhan Bakalli / Mjeshtëria 3,000 m 11’05’’00
Femra
Atleti / Klubi Gara Rezultati
Pamela Asllani / Dinamo Gjyle 9.13 m
Joana Hazisllari / Teuta 3-hapësh 10.75 m
Joana Hazisllari / Teuta Së gjati 5.28 m
Esra Dibra / Vllaznia Së larti 1.35 m
Elisa Myrtollari / Skënderbeu 60 m 7’’94
Melisa Sina / Partizani 60 m/p 9’’54
Livia Topi / Skënderbeu 400 m 1’00’’23
Relaksa Dauti / Tirana 800 m 2’17’’82
Redia Dauti / Tirana 1,500 m 4’49’’09
Rigerta Pjetra / Tirana 3.000 m 10’54’’62
