“Të vrapojmë për t’i thënë jo kancerit të gjirit”. Ky ishte mesazhi që përcolli “Maratona e Jetës”, që u zhvillua dje në Kodrat e Liqenit Artificial, një veprimtari që kishte në thelb sensibilizimin e të gjitha grave shqiptare për kryerjen e kontrolleve parandaluese kundër kësaj sëmundjeje. Përpara dhënies së sinjalit të startit për nisjen e maratonës në Parkun e Liqenit Artificial të Tiranës, përshëndetën dhe dhanë mesazhe sensibilizimi kundër kancerit, ministri i Shëndetësisë, Ilir Beqaj, si dhe Kryetari i Bashkisë së Tiranës, Erion Veliaj. Në mesazhin e tij, drejtuar grave shqiptare, ministri Beqaj tha se kujdesi për shëndetin është tashmë sfidë e të gjithë shoqërisë shqiptare.
“Ajo që synojmë përmes këtyre veprimtarive është të zhvendosim vëmendjen nga sëmundja te shëndeti dhe nga pacienti te qytetari duke i sensibilizuar ata që të rrisin kujdesin për të pasur jetë të shëndetshme”, – tha ai. Kreu i Bashkisë së Tiranës, Veliaj shprehu besimin e tij se një qytet i shëndetshëm është formula afatgjatë për të trajtuar sëmundjen në mënyrë që financat tona të mos shkojnë për t’u shëruar, por më me pak shpenzime për të parandaluar sëmundjet. “Në këtë kuadër – tha ai – Tirana tashmë po bën traditë edhe “Ditën pa makina. Dita më e pastër ishte 22 shtatori, dita e parë pa makina, ku niveli i helmeve ra nën normën e vendeve evropiane.”
“Ne besojmë se një qytet i shëndetshëm është një formulë afatgjatë për të trajtuar sëmundjen e për t’u siguruar që qëndrueshmëria e financave tona nuk shkon në shpenzime për t’u kuruar, por me pak shpenzime për të parandaluar sëmundjet”, – shtoi Veliaj. Gra, vajza, por edhe burra iu bashkuan të dielën Maratonës së Jetës në të cilën pati edhe profesionistë. Pas së cilës Genci Lugja dhe Relaksa Dauti ishin fitues të kësaj Maratone. Për meshkuj në vendin e dytë u renditën Bledar Mesi dhe në të tretin Malvin Nikolla. Dhe “Maratona e Jetës” do të bëhet një veprimtari e përvitshme për Bashkinë e Tiranës, ashtu sikurse “Dita pa Makina”.