ASNN – Një nga sipërmarrjet më interesante sportive që këtyre dy dhjetëvjeçarëve të fundit në Shqipëri, Akademisë Sportive “Goga Basket”, ka bërë gjatë këtyre dy-tri ditëve të fundit dy goditje mjaft domethënëse, që konfirmojnë edhe një herë seriozitetin e një investimi afatgjatë për zhvillimin e këtij sporti në vend. Kështu, më datë 20 nëntor, u zhvillua një takim në zyrat qendrore të “Olimpia Armani Jeans” ne Milano, ndërmjet drejtuesve të Akademisë Sportive “Goga Basket” dhe drejtuesve të klubit të njohur italian të basketbollit.
Në këtë takim, drejtuesit e “Armani Jeans”, pasi u njohen nëpërmjet presidentit Perikli Goga dhe drejtorit sportiv, Marsel Aliaj, me projektin “Goga Basket”, për të cilin kishin informacion për investimin e bërë, e mirëpritën me entuziazëm këtë projekt dhe propozuan një bashkëpunim të gjithanshëm. Ky bashkëpunim fillimisht do të konsistojë së pari në ndihmë teknike, ku Manaxheri i Përgjithshëm i “Armani Jeans”, Alberto Rosini u shpreh se klubi i tij mund të sjellë anëtarë të stafit teknik të milanezëve, për të ofruar përvojën e tyre.
Gjithashtu, “Goga Basket” mund të dërgojë trajnerët e saj të moshave për të marrë përvojë nga stërvitjet e “Armani Jeans” në Milano. Në ditët e ardhshme do të mësohen edhe më tepër hollësi sa i përket këtij bashkëpunimi. Ndërkohë, sot në mbrëmje, u bë e ditur se Spiro Leka, një nga trajnerët shqiptarë me një karrierë të pasur sportive jashtë vendit, ka firmosur një marrëveshje 6-mujore me Akademinë Sportive “Goga Basket” ku do të ushtrojë detyrën e këshilltarit të Akademisë.
Spiro Leka do të trajnojë trajnerët e rinj të Goga Basketit dhe do të vërë në zbatim programet stërvitore më bashkëkohore për stërvitjen e grupmoshave, si dhe do të luajë rolin e këshilltarit të presidentit të Akademisë. Me ardhjen e tij, si dhe pritjen e firmosjes se marrëveshjes së bashkëpunimit me “Armani Jeans Milano”, Akademia e qytetit bregdetar do të realizojë objektivin e saj për ta kthyer Arenën Sportive “Dhimitraq Goga” në një shkollë të mirëfilltë basketbolli në Shqipëri.
