ASNN – Kampionati Kombëtar i Basketbollit për Femra vazhdon duelin e tij final dhe, në ndeshjen e dytë, të zhvilluar në Vlorë, Apolonia ia ka kthyer reston Flamurtarit vendas, duke fituar me shifrat 63-61 dhe duke e barazuar rezultatin e përgjithshëm të finales në 1-1. Vlonjatet e kishin fituar ndeshjen e parë, të luajtur në Durrës, por fieraket e drejtuara nga veterani Astrit Greva, janë kundërpërgjigjur me të njëjtën monedhë.
Apolonia e ka nisur mjaft mirë, duke e fituar pjesën e parë 13-4 dhe, ndonëse Flamurtari fiton të dytën 17-12, fieraket fitojnë edhe pjesën e 3-të 24-20, duke e bërë të pavlefshme fitoren e 10-minutëshit të 4-t, 20-14, nga ana e vlonjateve. Apolonia barazon kështu serinë e finaleve 1-1 të “play off”-it në basketboll për femra. Pjesa e parë nis mjaft keq për vlonjatet.
Aq keq sa ato nuk arrijnë të shënojnë asnjë pikë në 6 minutat e para ndaj Apolonisë, të cilat shënojnë 11 pikë. Në 2 minutat e fundit, Flamurtari shënon 2 pikë me Korton, e cila pasohet nga Vukoviç. Krejt pjesa e parë mbyllet 4-13. Vendëset zgjohen në pjesën e dytë ku Zykaj, Korto, Plasa e Vukoviç bëjnë diferencën duke mbyllur këtë pjesë në favorin e tyre, 17-12.
10-minutëshi i tretë karakterizohet nga një lojë e shpejtë e Apolonisë, që e mbyll me shifrat 24-20. Trajneri vlonjat, Viron Toska bën zëvendësime të shpeshta në pjesën e 4-t dhe mënyra e lojës e rezultati ndryshon në favor të Flamurtarit. Për herë të parë barazohet rezultati 49-49. Por Apolonia nuk lëshon dhe në një betejë nervash triumfon 63-61.
Kur duhej edhe 1 minutë e 23 sekonda deri në përfundim të ndeshjes, amerikania Lov del me 5 personale dhe e shqetësuar godet me shkelm stolin e rezervave duke tërhequr vëmendjen e sportdashësve..
Flamurtari – Apolonia 62-63 (1-1)
(4-13, 17-12, 20-24, 21-14)
Flamurtari: Zykaj (10), K. Hasanaj, Plasa (19), Korto (4), Kostallari (3). U aktivizuan: Palko (4), Komti, Vukoviç (19), Myrto (2). Trajner: V. Toska
Apolonia: E. Semanjaku (20), Xhanaj (21), Dishnica (9), Perquku (2), Lov (10). U aktivizuan: Memçaj, Demiraj, Ustalli (1). Trajner: A. Greva
Gjyqtarë: G. Basho, O. Kasmi, J. Gokaj
