ASNN – Në morinë e zërave që shtohen përditë nga komuniteti i futbollit është edhe ai i trajnerit të Apolonisë, Artan Mërxhushi, i cili ka shprehur zhgënjimin e tij me mënyrën sesi po trajtohet ky sport në kuadrin e krizës së shkaktuar nga epidemia e virusit korona. Në kohën kur u ndërpre kampionati, në mesin e marsit, skuadra fierake mbante vendin e dytë pas 18 ndeshjesh në renditjen e grupit B, apo grupit të Jugut, me 37 pikë, dy më pak sesa Pogradeci kryesues, dhe dy më tepër sesa Lushnja e vendit të dytë, dhe është pretendente reale për ngjitjen në Kategorinë Superiore sezonin e ardhshëm.
“Është për të ardhur keq që neglizhohet futbolli, – ka thënë Mërxhushi ndër të tjera, në një intervistë dhënë për të përditshmen sportive shqiptare, “Panorama Sport”. – Nuk e them këtë se jemi në kreun e renditjes dhe na intereson kjo pjesë, por për shumë arsye them që futbolli ka interesin e vet te rinia, shoqëria dhe gjithë opinioni publik. Është një industri më vete që mund të bëhet një burim shumë funksional. Qeveria po e anashkalon jo vetëm këtë rast, por edhe me miratimin e ligjit të sportit e shumë probleme të tjera.”
“Minimumi që duhet të bëjë qeveria, duhet të jetë në koordinim me FSHF-në, jo heshtje për fatin e futbollit për kërkesat që FSHF-ja deklaron se ka bërë, – ka vijuar trajneri që të mërkurën festoi edhe 52-vjetorin e tij të lindjes. – Është për të ardhur keq, aq më tepër që kryeministri është një ish-sportist dhe e shikon sportin si të “njerkës”. Duhet që të gjithë ne të komunitetit të futbollit të rritim trysninë ndaj qeverisë. Nuk mendoj që përballë atyre turmave që dynden nga liqeni përditë, futbolli me 20 lojtarë që do të luajë në një hapësirë të përcaktuar dhe me masa të rrepta, të ketë rreziqe më të mëdha.”
“Të paktën në këtë periudhë të fillojë stërvitjen në grupe dhe pastaj, duke parë ecurinë, të bashkohen në një grup të vetëm”, – ka shtuar ai. Nëse nuk rifillon kampionati, në rastin më të keq, është hedhur ideja e modelit francez për mbylljen mbi bazën e renditjes aktuale në çdo kategori. Për Mërxhushin, kjo është në dorë të organizmit që qeveris futbollin në vend. “Nuk po them shprehjen standarde që “e mira do të ishte që ekipet të luanin në fushë”, – ka thënë kryeqyteti i stolit fierak. – Do të ishte optimalja, por do të thosha që në situata të jashtëzakonshme duhen vendime të jashtëzakonshme.”
“I takon FSHF-së të mbledhë Komitetin Ekzekutiv, të diskutojë dhe të gjejë një zgjidhje”, – ka përfunduar trajneri i Apolonisë, Artan Mërxhushi.
