ASNN – Për ndeshjet me Andorrën dhe Hungarinë thërret Sançon,Tomorin e Uatsonin. Trajneri Gareth Sauthgejt mendoi ta linte jashtë përfaqësueses së Anglisë, Xhejdon Sançon këtë radhë, por e përfshiu sërish në listë futbollistin e Mançester Junajtid për të shmangur faktin se mosgrumbullimi mund t’i shkaktonte lojtarit më shumë pasiguri. Edhe pse u ble 73 milionë stërlina nga Borusia e Dortmundit, Sanço nuk e ka nisur mbarë sezonin me Mançester Junajtid.
21-vjeçari ka luajtur vetëm dy herë për Anglinë këtë vit, një miqësore kundër Rumanisë dhe në çerekfinale të “Euro 2020”-ës kundër Ukrainës, por Sauthgejt vazhdon t’i besojë atij. “A e meriton ai të marrë pjesë në këto dy ndeshje, pas paraqitjes jo të mirë në kampionat? – u pyet Sauthgejt, duke u përgjigjur: “Epo, ndoshta jo. Por ne kemi investuar tek Xhejdoni gjatë një periudhe kohe. Ne besojmë se ai mund të arrijë një nivel të lartë.”
“Do të doja kohë për të biseduar me të dhe për ta ndihmuar atë në procesin që po ndodh tek Mançester Junajtid, – ka vijuar trajneri. – E grumbullova që ai të ndiejë se ne kemi besim tek ai. E ky është një mesazh i mirë për të”. Por ndërsa për Sanço kishte një vend në listën e 23 futbollistëve të grumbulluar që do të përballen me Andorrën dhe Hungarinë, Mejsën Grinuud dhe Xhjudë Bellingam u lanë jashtë, pas bisedimeve që bëri Sauthgejti me klubet dhe familjet e tyre.
Në skuadër janë afruar mbrojtësi i Milanit, Fikajo Tomori, dhe sulmuesi i Aston Vilës, Uotkins. Për ndeshjet e tetorit, Anglia duhet të jetë më pak nën presion. Atyre u duhet të mposhtin fillimisht Andorrën dhe më pas të presin me qetësi Hungarinë në “Uembli”. Ambicia e trajnerit Gareth Sauthgejt për Anglinë e tij është që të përfundojë një vit kalendarik pa humbje.
