ASNN – Të gjithë ata që duan të ndjekin kampionatin anglez, në stadium, duhet të jenë të vaksinuar ndaj “Covid-19” ose duhet të paraqesin një test negativ të 48 orëve të fundit. Ky është lajmi i fundit që vjen nga Britania e Madhe, për të gjithë tifozët anglezë që do të jenë prezent në stadium për të ndjekur ndeshjet e Premier Ligës për sezonin 2021-2022.

“Për ndeshjet e para të sezonit të ri futbollistik, tifozët duhet të presin të kontrollohen, përpara se të hyjnë në stadium. Në hyrje të stadiumeve ata duhet të paraqesin pasaportën e vaksinimit ose një test negativ të “Covid-19”, të kryer në 48 orët e fundit”, – ka lajmëruar Premier Liga. Kjo masë paraprake do të aplikohet të paktën në javët e para të sezonit të ri, që nis në 13 gusht, me ndeshjen Brentford-Arsenal.

Qeveria britanike ka refuzuar deri tani të aplikojë një leje shëndetësore të detyrueshme, por klubet, gjithsesi janë gati për të përballuar një ndryshim të gjendjes së tanishme në muajt e ardhshëm. Me objektivin për të rimbushur sërish stadiumet me kapacitet të plotë. Aktualisht, 9 lojtarë apo drejtues të një klubi në Premier Ligë  kanë rezultuar pozitivë, në raundin e fundit të testeve të zhvilluar së fundmi.

Por drejtuesit e kampionatit anglez nuk e kanë bërë të ditur emrin e skuadrës.