ASNN – Çiklisti Lens Armstrong ishte i jashtëzakonshëm deri në fund të karrierës së tij dhe fitoi 7 tituj botërorë, duke dalë në “pension” i panjollosur. Por një ditë të bukur pas shumë vitesh, si mëkatari para priftit, ai rrëfeu se kishte përdorur doping dhe se rezultatet kishin qenë të gënjeshtërta. Zhgënjimi ishte aq i madh sa ishte edhe e vështirë ta besoje. Ai u kishte ikur agjentëve antidoping dhe nuk ishte zbuluar për shumë e shumë vite, derisa e pranoi vetë. Shumë njerëz pyesin, po Jusein Bolt, a ka përdorur doping?
Dyshimi është shumë i madh, sidomos kur rezultatet janë të ngjashme me robotët dhe makineritë e avancuara. Ndoshta një ditë Bolt vendos të “rrëfehet” vetë, sepse deri më sot ai nuk ka rezultuar pozitiv në kontrollet antidoping. Gjithmonë ka pasur dyshime rreth tij, por asnjëherë ai nuk është penalizuar për përdorim dopingu. Dhe në fakt, Jusein Bolt ka treguar talent të jashtëzakonshëm që kur filloi të vraponte për herë të parë.
Kohët e tij janë në përputhje me një atlet të talenteve dhe përmasave të jashtëzakonshme. Duke përdorur logjikën e thyerjes së rekordeve dhe vendosjes së rezultateve, Bolt u ka dhënë përgjigje njerëzve që kanë dyshuar se ai ka përdorur doping. “Unë isha personi më i ri që ka fituar Kampionatin Botëror të Të Rinjve, kur isha vetëm 15 vjeç, – ka kujtuar xhamajkani. – Unë konkurrova për rekordin botëror të paratërinjve dhe të rinjve në 200 metra.”
“Dhe në moshën 17 vjeç e ula rekordin nën 20 sekonda, duke vendosur një rezultat të ri, 19.93 sekonda, – ka vijuar ai. – Kam thyer çdo rekord që mund të thyhet, në çdo rast rezultatet kanë brenda logjikës, sepse me rritjen e moshës dhe kulmet përmirësoheshin dhe rezultatet. Pra, unë e kam provuar dhe treguar veten që kur isha 15 vjeç. Unë vit pas viti e garë pas gare e tregova në pistë se do të isha atlet i madh. Në këtë hark kohor nuk pati anomali që të ngjallin dyshime.”
E vërteta është se Jusein Bolt ka bërë shumë kontrolle antidoping dhe vetë IAAF ka këmbëngulur që t’i bëhet testime për përdorim stimulantësh, por ai asnjëherë nuk ka rezultaru pozitiv në këto teste. E megjithatë dyshime janë ngritur dhe kjo ka të bëjë me Federatën Xhamajkane të Atletikës, e cila nuk pati seriozitet kur bëri kontrollin antidoping gjatë vitit 2012 para se të niste Olimpiada e Londrës. Një vit më vonë, më 2013, rezultoi që kjo federatë kishte dështuar.
Sepse kampionët e mëdhenj, Asafa Pauell dhe Veronika Kempbëll Braun kishin rezultuar pozitiv. Menjëherë pas këtij rasti, WADA urdhëroi një testim të jashtëzakonshëm të programit antidoping të Xhamajkës dhe për t’i shkuar deri në fund nismës kërcënoi me bllokimin e Xhamajkës në garat ndërkombëtare. Por për Boltin nuk u tha asgjë, ai vazhdimisht përsëriste se ishte i pastër. Dhe më kryesorja, ai ka lënë një mesazh të fortë pas atyre ngjarjeve.
“Unë e bëra atletikën madhështore për të frymëzuar njerëzit dhe për të kandiduar si fitues për vendin tim, dhe unë besoj se u kam bërë një dhuratë njerëzve. Në fakt, kjo është ajo që di të bëj. Unë kam siguri në veten time dhe në ekipin tim, kam besim tek njerëzit me të cilët punoj. Dhe unë e di që jam i pastër. Kështu që unë po vijoj të vrapoj, duke përdorur talentin tim dhe vetëm duke u përpjekur për të përmirësuar sportin”, – do të shprehej pak vite më parë Bolt, legjenda e 100 dhe 200 metrave.
